అర్నబ్ తుఫాను తీవ్ర వాయుగుండంగా మార్పు, ఉత్తర ఆంధ్రా జిల్లాల్లో భారీ వర్షాల హెచ్చరిక

అర్నబ్ తుఫాను బలహీనపడి తీవ్ర వాయుగుండంగా మారింది. దీని ప్రభావంతో శ్రీకాకుళం, పార్వతీపురం మన్యం, విజయనగరం జిల్లాల్లో ఒకటి రెండు చోట్ల భారీ వర్షాలు కురిసే అవకాశం ఉంది.

మిగిలిన ప్రాంతాల్లో తేలికపాటి నుంచి మోస్తరు వర్షాలు కురుస్తాయి. గంటకు 40 నుంచి 50 కిలోమీటర్ల వేగంతో ఈదురుగాలులు వీచే అవకాశం ఉంది. భారీ వర్షాల వల్ల ఫ్లాష్ ఫ్లడ్స్ వచ్చే అవకాశం ఉందని విపత్తుల నిర్వహణ సంస్థ అధికారులు హెచ్చరించారు. లోతట్టు ప్రాంతాల ప్రజలు అప్రమత్తంగా ఉండాలని సూచించారు.

తుఫాను సమయంలో కోస్తా జిల్లాల్లో గంటకు 135 కిలోమీటర్ల వేగంతో గాలులు వీచాయి. వేలాది విద్యుత్ స్తంభాలు, చెట్లు నేలకూలాయి. లక్షలాది ఇళ్లకు విద్యుత్ సరఫరా నిలిచిపోయింది. కోనసీమ, కాకినాడ, ఉభయ గోదావరి, కృష్ణా జిల్లాల్లో ప్రభావం ఎక్కువగా ఉంది. 70 వేల హెక్టార్లలో వరి పంట, 10 వేల హెక్టార్లలో ఉద్యాన పంటలు నీట మునిగాయి. రోడ్లు దెబ్బతినడంతో రవాణాకు అంతరాయం ఏర్పడింది.

APEPDCL పరిధిలో ప్రాథమిక అంచనా ప్రకారం ₹11.70 కోట్ల నష్టం జరిగింది. 7,000కు పైగా విద్యుత్ స్తంభాలు, 939 కిలోమీటర్ల విద్యుత్ లైన్లు, 470 సబ్‌స్టేషన్లు, 2,539 విద్యుత్ పరికరాలు దెబ్బతిన్నాయి. 4,016 గ్రామాల్లో విద్యుత్ సరఫరాకు అంతరాయం ఏర్పడింది. ఇప్పటివరకు 1,874 గ్రామాల్లో సరఫరాను పునరుద్ధరించారు.

6,674 మంది సిబ్బంది 582 ప్రత్యేక బృందాలుగా పునరుద్ధరణ పనులు చేస్తున్నారు. 25.32 లక్షల వ్యవసాయేతర సర్వీసుల్లో 6.37 లక్షల సర్వీసులకు విద్యుత్ పునరుద్ధరించారు. 94,439 వ్యవసాయ సర్వీసుల్లో 20,989 సర్వీసులకు మరమ్మతులు పూర్తయ్యాయి. నేలకూలిన స్తంభాలు, తెగిపడిన విద్యుత్ తీగలను తాకవద్దని అధికారులు సూచిస్తున్నారు. విద్యుత్ అంతరాయాల సమాచారాన్ని 1912 నంబర్‌కు తెలియజేయాలని కోరుతున్నారు.