దక్షిణాయణం ప్రారంభం: ఈరోజు నుంచి చేయాల్సిన వ్రతాలు, దానాలు

హిందూ పంచాంగం ప్రకారం దక్షిణాయణ పుణ్యకాలం ఈరోజు ప్రారంభమైంది. ఈ కాలం మొత్తం పుణ్యకార్యాలకు, దానాలకు, ఆధ్యాత్మిక సాధనలకు ప్రాధాన్యత ఇవ్వాలని సంప్రదాయం చెబుతోంది. గురుమూఢం ఉన్నందున వివాహాలు, గృహప్రవేశం వంటి శుభకార్యాలు చేయకూడదని పండితులు సూచిస్తున్నారు.

ఈ సందర్భంగా వస్త్రాలు, దిండు, పరుపు, దుప్పటి, కంబలి వంటివి దానం చేయడం శాస్త్రం ప్రకారం విశేష ఫలితాన్నిస్తుందని చెబుతున్నారు. అలాగే తీర్థయాత్రలు, అభిషేకం, జపం, ఆలయ సందర్శన, మౌనవ్రతం పాటించడం వల్ల పుణ్యం పెరుగుతుందని పెద్దలు తెలియజేస్తున్నారు.

ఆహార నియమాల్లో ఆషాఢ మాసం ప్రత్యేకత ఉంది. ఈ నెలలో ఆకుకూరలు తినడం మానివేసి, వాటిని గోవులకు ఆహారంగా అందించాలని సూచిస్తున్నారు. వర్షాకాలంలో ఆకుకూరల్లో ఉష్ణతత్వం ఎక్కువగా ఉండడం వల్ల ఇది ఆరోగ్యానికి మంచిది కాదని శాస్త్రం చెబుతోంది.

దక్షిణాయనాన్ని పురస్కరించుకుని గృహాలను కూరగాయల దండలతో అలంకరించడం, ద్వారానికి కూరగాయలను వేలాడదీయడం శాకంభరి అమ్మవారి అలంకారంగా చెప్తారు. స్వీయ నియమాలతో ఆహారం మితంగా తీసుకుంటూ, ఇష్టమైన పదార్థాల పట్ల వైరాగ్యం సాధన చేయాలని సంప్రదాయం నొక్కి చెబుతోంది.