Delhi Rain: భారీ వర్షంతో ఢిల్లీ అతలాకుతలం – రోడ్లు నదులుగా, ఇళ్ళు కూలిన ఘోరం

శుక్రవారం ఉదయం నుంచి కురుస్తున్న భారీ వర్షం ఢిల్లీ-ఎన్సిఆర్‌ను పూర్తిగా స్తంభింపజేసింది. రోడ్లు నదులుగా మారిపోయి, నడుము లోతు నీళ్లు నిలిచాయి. దక్షిణ ఢిల్లీలోని మెహ్రౌలి-బదర్పూర్ రోడ్డుపై 3-4 అడుగుల మేర నీరు చేరడంతో వాహనాలు నిలిచిపోయాయి. తూర్పు ఢిల్లీలోని గాంధీ నగర్, గీతా కాలనీ ప్రాంతాల్లో ద్విచక్రవాహనాలు, ఆటోలు, కార్లు నీటిలో చిక్కుకున్నాయి. నోయిడాలో మహామాయ ఫ్లైఓవర్ సమీపంలో ఓ అంబులెన్స్ 30 నిమిషాల పాటు నీటి అడుగున నిలిచిపోయింది. గురుగ్రామ్‌లోని ప్రభుత్వ ఆసుపత్రి బేస్‌మెంట్, గ్రౌండ్ ఫ్లోర్‌లోకి వర్షపు నీరు చేరడంతో ఆపరేషన్లు నిలిపివేశారు. ఢిల్లీ ఫైర్ సర్వీస్ ప్రకారం, గత రాత్రి నుంచి 9 ఇళ్లు కూలిపోయాయి, 16 చోట్ల పెద్ద చెట్లు నేలకొరిగాయి. ఓ సంఘటనలో ఇంటిపై చెట్టు పడటంతో ముగ్గురు మహిళలు చిక్కుకోగా, ఫైర్ సిబ్బంది కొమ్మలు కోసి వారిని రక్షించారు. కేంద్రీయ రోడ్లు, ఎక్స్‌ప్రెస్ వేలపై భారీ ట్రాఫిక్ జామ్ ఏర్పడింది. వాతావరణ శాఖ శనివారం తెల్లవారుజాము నుంచి వర్షం తీవ్రత తగ్గే అవకాశం ఉందని తెలిపింది. ప్రస్తుతం ఢిల్లీ ప్రజలు ఇండ్లకే పరిమితమవ్వాలని అధికారులు హెచ్చరించారు.