ఎల్‌నినో వల్ల సముద్ర జీవులకు తీవ్రమైన ముప్పు: చేపల దిగుబడి 20% పడిపోయే అవకాశం

ఎల్‌నినో పెను ముప్పు సముద్రాలను కమ్మేస్తోంది. మెరైన్ హీట్ వేవ్స్ దెబ్బకు సముద్ర పర్యావరణం అల్లకల్లోలంగా మారుతుందని నిపుణులు హెచ్చరికలు జారీ చేశారు. ఈ ఏడాది సముద్ర ఉత్పత్తులు తీవ్రంగా ప్రభావితం కానున్నాయని, కనీసం 20% చేపల దిగుబడి పడిపోతుందని అంచనా వేస్తున్నారు.

ఆక్సిజన్ కొరత ఏర్పడినప్పుడు జలచరాలు పెద్ద సంఖ్యలో మృత్యువాత పడే ప్రమాదం ఉందని ఆందోళన వ్యక్తమవుతోంది. పసిఫిక్ సముద్రంలో ఉష్ణోగ్రతలు పెరగడం వల్ల వచ్చే సంకేతాలు భారత మహాసముద్రానికి చేరుకోవడానికి కొంత సమయం పట్టినా, చివరికి ఇక్కడి జలచరాలపై తీవ్ర ప్రభావం పడుతుందని శాస్త్రవేత్తలు స్పష్టం చేశారు.

ఈ ఏడాది నవంబర్ నుండి 2024 జనవరి మధ్య ఎల్‌నినో తీవ్రత గరిష్ట స్థాయికి చేరుకుంటుందని, ఆ సమయంలో సముద్ర ఉపరితల ఉష్ణోగ్రతలు సాధారణం కంటే రెండు నుండి మూడు డిగ్రీలు అధికంగా నమోదవుతాయని అంచనా వేస్తున్నారు. బంగాళాఖాతంలో థర్మల్ స్ట్రెస్ అధికంగా ఉంటుందని, దానివల్ల జలచరాలు తీవ్రంగా ప్రభావితమవుతాయని నిపుణులు పేర్కొన్నారు.

ఇటీవల అనకాపల్లి జిల్లా బోయేపాడు తీరంలో వందల సంఖ్యలో చేపలు మరణించి వడ్డుకు కొట్టుకొని వచ్చాయి. సముద్ర కాలుష్యం మరియు ఫార్మా కంపెనీల నిర్లక్ష్యం కారణం అనే ఆరోపణలతో విచారణ జరుగుతోంది. అయితే ఒకే జాతి చేపలు మృత్యువాత పడడం వెనుక సముద్రంలో ఆక్సిజన్ కొరత కూడా కారణమని నిపుణులు అభిప్రాయపడుతున్నారు.

ఎల్‌నినో కారణంగా సముద్ర ఉష్ణోగ్రతలు పెరిగినప్పుడు సముద్రపు అడుగుభాగంలో ఉండే పోషకాలు పైకి రావు. దీంతో చేపలకు మరియు సముద్రపు మొక్కలకు సరైన పోషకాలు అందవు. ఫైటోప్లాంక్టన్ ఉత్పత్తి తీవ్రంగా దెబ్బతింటుంది. లార్వల్ దశలో చేపలకు అవసరమైన మైక్రో ఆల్గే చనిపోవడంతో చేప జనాభాపై 10 నుండి 20% వరకు ప్రతికూల ప్రభావం పడుతుందని శాస్త్రవేత్తలు వివరించారు.

తూర్పు తీరంలో సుమారు 60 రకాల సముద్ర ఉత్పత్తులు లభిస్తాయి. వీటిలో కవ్వలు, రొయ్యలు, పీతలు దేశీయ అవసరాలకు సరిపోతుండగా, ట్యూనా వంటి చేపలు లక్షల టన్నుల స్థాయిలో విదేశాలకు ఎగుమతి అవుతాయి. సూపర్ ఎల్‌నినో కారణంగా మెరైన్ మరియు ఆక్వా పరిశ్రమ తీవ్రంగా ప్రభావితమయ్యే ప్రమాదం ఉందని నిపుణులు ఆందోళన వ్యక్తం చేస్తున్నారు.

ఆక్వా రైతులు ముందస్తు జాగ్రత్తలు తీసుకోవడం అనివార్యమని నిపుణులు సూచిస్తున్నారు. చెరువుల్లో ఏరియేటర్లు వినియోగిస్తూ నీటి నిల్వల స్థాయిని పెంచుకోవడం ద్వారా ఉష్ణోగ్రత ప్రభావం నుండి కొంత మేరకు రక్షించుకోవడం సాధ్యమని చెప్పారు. సముద్ర జీవులు హఠాత్తుగా పెరిగే ఉష్ణోగ్రతలను తట్టుకోలేక చల్లటి ప్రాంతాలకు వలస వెళ్ళిపోవడం వల్ల చేపల వేటపై తీవ్ర ప్రభావం పడే అవకాశం ఉందని హెచ్చరిస్తున్నారు.