పాట్నాలో ఫైజల్ ఖాన్ కోచింగ్ సెంటర్లో షార్ట్ సర్క్యూట్; విద్యార్థులు భయంతో పరుగులు

పాట్నాలోని ప్రముఖ టీచర్ ఫైజల్ ఖాన్ (ఖాన్ సర్) నిర్వహిస్తున్న కోచింగ్ ఇన్‌స్టిట్యూట్లో షార్ట్ సర్క్యూట్ వల్ల అగ్ని ప్రమాదం చోటు చేసుకుంది. భారీగా పొగ వ్యాపించడంతో విద్యార్థులు భయంతో బిల్డింగ్ నుంచి బయటకు పరుగులు తీశారు.

షార్ట్ సర్క్యూట్ కారణంగా మంటలు చెలరేగగా, కొద్ది సేపట్లోనే కోచింగ్ సెంటర్ అంతటా దట్టమైన పొగ అలుముకుంది. ఆ సమయంలో క్లాసులు జరుగుతుండగా, ఒక్కసారిగా పొగ వచ్చి నిండిపోవడంతో విద్యార్థులు భయభ్రాంతులకు గురయ్యారు. వెంటనే మెట్లు, ఎమర్జెన్సీ ద్వారాల గుండా బయటకు పరుగులు తీశారు.

స్థానికులు అగ్నిమాపక సిబ్బందికి సమాచారం అందించారు. ఫైరింజన్లు రావడానికి ముందే చాలా మంది విద్యార్థులు సురక్షితంగా బయటకు వచ్చేశారు. ఘటనతో కాసేపు ఉద్రిక్తత నెలకొంది.

ఫైజల్ ఖాన్ అలియాస్ ఖాన్ సర్ బీహార్‌లో ప్రముఖ ఆన్‌లైన్ టీచర్. ఆయన యూట్యూబ్ ద్వారా ఉచిత కోచింగ్ ఇస్తుండగా, ఆయన కోచింగ్ సెంటర్లో పోటీ పరీక్షలకు సన్నద్ధమయ్యే వేలాది మంది విద్యార్థులు ఉన్నారు.