గద్వాల ప్రభుత్వ బాలికల జూనియర్ కళాశాలలో మౌలిక వసతుల కొరత; విద్యార్థినుల ఇబ్బందులు

జోగులాంబ గద్వాల జిల్లాలోని ప్రభుత్వ బాలికల జూనియర్ కళాశాలలో మౌలిక సదుపాయాల కొరత తీవ్రంగా ఉంది. 2023లో ఏర్పాటైన ఈ కళాశాలలో ఇంటర్ మొదటి, రెండో సంవత్సరం కలిపి 400 మందికి పైగా విద్యార్థినులు చదువుతున్నారు.

కానీ కళాశాల భవనంలో మొత్తం ఏడు గదులు మాత్రమే ఉన్నాయి. వాటిలో ప్రిన్సిపల్ గది, స్టాఫ్ రూం తప్ప మిగిలిన ఐదు తరగతి గదుల్లో విద్యార్థులు సర్దుకోవాల్సి వస్తోంది. జాగా సరిపోక కొందరు విద్యార్థులు కారిడార్లో, వరండాలో, మైదానంలో కూర్చుని పాఠాలు వినాల్సి వస్తోంది. వర్షం వస్తే బయట కూర్చోలేని పరిస్థితి ఉందని విద్యార్థులు చెబుతున్నారు.

తాగునీటి సౌకర్యం సరిగా లేదు. పక్క కళాశాల నుంచి నీరు తెచ్చుకుంటున్నారు. విద్యా శాఖ ప్రకటించిన మధ్యాహ్న భోజన పథకం ఈ కళాశాలలో ఇంకా అమలు కాలేదు. గ్రామాల నుంచి వచ్చే విద్యార్థులు ఉదయం ఆహారం తీసుకోకుండా కళాశాలకు చేరుకుంటారు. మధ్యాహ్న భోజనం కూడా లేకపోవడంతో కొంతమందికి కడుపునొప్పి, ఇతర ఆరోగ్య సమస్యలు వస్తున్నాయని విద్యార్థులు ఆవేదన వ్యక్తం చేస్తున్నారు.

ప్రస్తుతం ఉన్న తరగతి గదుల్లో కొన్నింటిని ల్యాబులుగా వాడుతుండడంతో అదనంగా కనీసం ఎనిమిది గదులు ఏర్పాటు చేయాల్సిన అవసరం ఉందని కళాశాల యాజమాన్యం చెప్తోంది. యూనిఫామ్ సైతం ఇంకా అందలేదు. త్వరలో సమస్యలు పరిష్కరించాలని విద్యార్థినులు కోరుతున్నారు.