హనుమకొండలో డాక్టర్ ఇంటి మేడపై ప్రకృతి వనం: పచ్చదనంతో నిండిన ఓ ప్రత్యేక నిలయం

హనుమకొండకు చెందిన హోమియోపతీ వైద్యుడు డాక్టర్ శ్రీనివాస్ రెడ్డి తన ఇంటిని ఓ చిన్న ప్రకృతి వనంగా మార్చారు. గత 30 ఏళ్లుగా వైద్య సేవలు అందిస్తున్న ఆయన, తన తండ్రి గోపాల్ రెడ్డి ప్రకృతిపై ఉన్న మక్కువతో ఈ ఆలోచన చేశారు.

పల్లెటూరి వాతావరణానికి అలవాటుపడిన గోపాల్ రెడ్డి నగర జీవితంలో పచ్చదనం, పక్షుల కిలకిలారావాలు కోల్పోయారు. దీంతో డాక్టర్ శ్రీనివాస్ రెడ్డి తమ నాలుగంతస్తుల భవనాన్ని ప్రకృతికి దగ్గరగా తీర్చిదిద్దాలని నిర్ణయించుకున్నారు.

ఇంటి టెర్రస్ పై భిన్న రకాల మొక్కలు, పచ్చటి గడ్డి, చెట్లు పెంచుతూ పక్షులకు అనుకూలంగా మార్చారు. అంతేకాకుండా, ఇంటి ప్రహరీ గోడలను చెట్ల కాండాల మాదిరిగా ప్రత్యేకంగా డిజైన్ చేశారు. చల్లటి గాలి, సూర్యోదయ దృశ్యాలు కుటుంబానికి ఎంతో ఆనందాన్ని ఇస్తున్నాయని ఆయన చెబుతున్నారు.