గుంటూరులో సింథటిక్ డ్రగ్స్ వ్యాప్తి: పోలీసుల నిఘా ముమ్మరం

గుంటూరు జిల్లాలో గంజాయి స్థానంలో సింథటిక్ డ్రగ్స్ వ్యాప్తి పెరుగుతోంది. కొకైన్, ఎండిఎంఏ వంటి ప్రమాదకర మాదక ద్రవ్యాలు సులభంగా అమ్ముతున్నారు. కాలేజీ విద్యార్థులు, యువతను లక్ష్యంగా చేసుకుని ఈ దందా సాగిస్తున్నారు.

మంగళగిరి సమీపంలోని డిలైట్ దాబా వద్ద ఎండిఎంఏ విక్రయిస్తున్న ముఠాను పోలీసులు అదుపులోకి తీసుకున్నారు. నిందితుల నుంచి గంజాయితో పాటు 9 గ్రాముల ఎండిఎంఏ స్వాధీనం చేశారు. తాజాగా పల్నాడు జిల్లా చిలకలూరిపేటలో నలుగురు డ్రగ్ సరఫరాదారులను అరెస్ట్ చేశారు. బెంగళూరు నుంచి తెచ్చిన 8 గ్రాముల ఎండిఎంఏను పోలీసులు స్వాధీనం చేసుకున్నారు.

గతంలోనూ గుంటూరులో సింథటిక్ డ్రగ్స్ కేసులు నమోదయ్యాయి. ఆరేళ్ల క్రితం హౌసింగ్ బోర్డ్ కాలనీలో నైజీరియన్ల నుంచి డ్రగ్స్ పట్టుబడ్డాయి. ఏడాది క్రితం 8 గ్రాముల కొకైన్‌ను ఎక్సైజ్ పోలీసులు స్వాధీనం చేశారు. ప్రస్తుతం పోలీసులు డ్రగ్స్ రవాణా, విక్రయాలపై నిఘా పెంచారు. నిందితులపై పీడీ యాక్ట్ కింద కేసులు నమోదు చేస్తున్నారు.