30-40 ఏళ్ల వయసులో గుండెపోటు పెరుగుతోంది – కార్డియాలజిస్ట్ హెచ్చరిక

30-40 ఏళ్ల వయసులో గుండెపోటు కేసులు పెరుగుతున్నాయని మెడికవర్ హాస్పిటల్స్ కార్డియాలజిస్ట్ డాక్టర్ కే సాకేత్ హెచ్చరించారు. ఆధునిక జీవన విధానం, ఒత్తిడి, అనారోగ్యకరమైన ఆహార అలవాట్లు, ధూమపానం, పొగాకు వాడకం ప్రధాన కారణాలుగా ఆయన పేర్కొన్నారు.

దీర్ఘకాలిక ఒత్తిడి కార్టిసాల్, అడ్రినలిన్ వంటి హార్మోన్లను విడుదల చేస్తుంది. దీని వల్ల గుండె వేగం హెచ్చుతగ్గులు, రక్తపోటు పెరగడం వంటి సమస్యలు వస్తాయి. ఒత్తిడి నుంచి తప్పించుకోవడానికి యువత ధూమపానం, జంక్ ఫుడ్, ఆల్కహాల్ వైపు మొగ్గు చూపుతోంది. ఇవన్నీ గుండె జబ్బుల ముప్పును మరింత పెంచుతాయి.

నిద్ర లేమి, స్క్రీన్ టైమ్ ఎక్కువ కావడం కూడా ఒత్తిడికి, నిద్ర సమస్యలకు కారణమవుతాయి. జిమ్‌లో ఆకస్మికంగా విపరీతమైన వ్యాయామం చేసే ముందు వైద్య పరీక్షలు చేయించుకోవాలి. గుండెలో ముందే తెలియని ఇబ్బందులు ఉన్నవారు జిమ్‌లో కుప్పకూలిపోయిన ఘటనలున్నాయి. 30 ఏళ్లు దాటినవారు లిపిడ్ ప్రొఫైల్, బీపీ, ఈసీజీ, 2డీ ఎకో, ట్రెడ్ మిల్ టెస్ట్ వంటి పరీక్షలు చేయించుకోవాలని డాక్టర్ సాకేత్ సూచించారు.

గుండెపోటు లక్షణాల్లో ఛాతీ నొప్పి, ఎడమ చేయి నొప్పి, అజీర్ణం లాంటి అనుభూతి, విపరీతమైన అలసట, చల్లటి చెమటలు ఉంటాయి. మధుమేహం, రక్తపోటు ఉన్నవారిలో నొప్పి లేకుండా కూడా గుండెపోటు రావచ్చు. ముఖ్యంగా 50 ఏళ్లు దాటిన డయాబెటిస్ రోగులు సైలెంట్ హార్ట్ అటాక్ పట్ల జాగ్రత్తగా ఉండాలి.

గుండె జబ్బులను నివారించడానికి కొలెస్ట్రాల్ (ఎల్డీఎల్ 70 కంటే తక్కువ), షుగర్, బీపీ నియంత్రణలో ఉంచుకోవాలి. ధూమపానం, పొగాకు పూర్తిగా మానేయాలి. వారానికి కనీసం 150 నిమిషాలు చురుకైన నడక లేదా వ్యాయామం చేయాలి. ప్రాసెస్డ్ ఫుడ్స్, ప్యాక్ చేసిన ఆహారాలు, ఎక్కువ ఉప్పును దూరం పెట్టాలి. కుటుంబంలో గుండె జబ్బుల చరిత్ర ఉంటే లైపోప్రోటీన్-ఏ (LP-A) వంటి ప్రత్యేక రక్త పరీక్షలు చేయించుకోవాలని డాక్టర్ సాకేత్ తెలిపారు.