ఏపీలో రాగల 48 గంటల్లో భారీ వర్షాలు, ఈదురు గాలులు; పలు జిల్లాలకు ఎల్లో అలర్ట్

రాగల రెండు రోజుల్లో ఆంధ్రప్రదేశ్‌లో పలు జిల్లాల్లో భారీ వర్షాలు, ఉరుములు, మెరుపులతో కూడిన వాతావరణం ఏర్పడే అవకాశం ఉందని IMD అధికారులు హెచ్చరించారు. విశాఖ తుఫాన్ హెచ్చరిక కేంద్రం అధికారి నాగభూషణం ఈ సూచనలు వెల్లడించారు. నైరుతి ఋతుపవనాలు చురుకైన కదలికలతో రాష్ట్రంలోని కళింగపట్నం వరకు విస్తరించిన నేపథ్యంలో వర్షాల పరిస్థితి నెలకొంది.

పశ్చిమ మధ్య బంగాళాఖాతం, ఉత్తర కోస్తా ఆంధ్ర ప్రాంతాల మీద ఉపరితల ఆవర్తనాలు, ద్రోణి ప్రభావంతో ఈ వర్షాలు సంభవిస్తాయని అధికారులు తెలిపారు. రాగల 24 గంటల్లో అల్లూరి సీతారామరాజు, కోనసీమ, పశ్చిమ గోదావరి, కృష్ణ, ప్రకాశం, నెల్లూరు జిల్లాల్లో ఒకటి, రెండు చోట్ల భారీ వర్షం కురుస్తుందని, దీంతో ఆ జిల్లాలకు ఎల్లో అలర్ట్ జారీ చేసినట్టు వారు తెలిపారు.

రాగల 48 గంటల వ్యవధిలో అల్లూరి సీతారామరాజు, ఏలూరు, ఎన్టీఆర్, కృష్ణ, తిరుపతి జిల్లాలతో పాటు రాయలసీమలోని అన్నమయ్య, వైఎస్సార్ కడప, నంద్యాల జిల్లాల్లోనూ భారీ వర్షాలు కురిసే అవకాశం ఉంది. దీనివల్ల ఈ ప్రాంతాలన్నింటికీ IMD ఎల్లో అలర్ట్ జారీ చేసింది. ఉత్తర కోస్తా జిల్లాలైన పార్వతీపురం, విజయనగరం, అల్లూరి సీతారామరాజు, విశాఖపట్నం, అనకాపల్లి, కాకినాడల్లో వడగాలులు వీచే అవకాశం ఉన్నందున ప్రజలు అప్రమత్తంగా ఉండాలని అధికారులు హెచ్చరించారు.

ఈదురు గాలులు రాగల రెండు రోజుల్లో గంటకు 50 నుంచి 60 కిలోమీటర్ల వేగంతో వీస్తాయని, మూడో రోజు నుంచి ఈ వేగం 40-50 కిలోమీటర్లకు తగ్గుతుందని అధికారులు వెల్లడించారు. మత్స్యకారులు వేటకు వెళ్లొద్దని హెచ్చరికలు జారీ చేశారు. తేమతో కూడిన వేడి వాతావరణం కూడా రాగల 48 గంటల పాటు కొనసాగే అవకాశం ఉందని IMD సూచించింది.

వాతావరణంలో వచ్చే మార్పులను నిశితంగా గమనిస్తూ, తదుపరి సమాచారం కోసం IMD హెచ్చరికలను అనుసరించాలని అధికారులు కోరారు.