ఉత్తర భారతదేశంలో భారీ వర్షాలు, వరదలతో పలు రాష్ట్రాల్లో జనజీవనం స్తంభించింది

ఉత్తర భారతదేశంలో వారం రోజులుగా కురుస్తున్న భారీ వర్షాలు పలు రాష్ట్రాల్లో వరదలు, రాకపోకలు స్తంభింపజేస్తున్నాయి. అస్సాం, బెంగాల్, మహారాష్ట్రతో పాటు ఈశాన్య రాష్ట్రాల్లో వరద పరిస్థితి తీవ్రంగా ఉంది.

అస్సాంలో కుండపోతగా కురుస్తున్న వానలతో ఆకస్మిక వరదలు వచ్చాయి. అనేక చోట్ల రాకపోకలు నిలిచిపోయాయి. అరుణాచల్ ప్రదేశ్‌లోని కేఈ పన్యార్ జిల్లాలో వరదలు రాకపోకలకు అంతరాయం కలిగించాయి. యాచూలి నుండి ఇటానగర్ వరకు నేషనల్ హైవే 13 స్థలాల్లో కొట్టుకుపోయిందని స్థానికులు తెలిపారు.

పశ్చిమ బెంగాల్ లోని పలు ప్రాంతాల్లోను భారీ వర్షాలు కురుస్తున్నాయి. కొల్‌కత్తాలో ఎడతెరిపి లేని వానలతో లోతట్టు ప్రాంతాలు జలమయం అయ్యాయి. వేలాది మంది ఇళ్లలోనే ఉండిపోయారు. వరద బాధితులు సహాయం కోసం ఎదురుచూస్తున్నారు. ఎస్డీఆర్ఎఫ్ బృందాలు రెస్క్యూ చర్యలు చేపట్టాయి.

మహారాష్ట్రలోని ముంబై, పుణే, పాల్ఘర్ జిల్లాల్లో భారీ వర్షం కురుస్తోంది. ముంబై నగరంలో పలు చోట్ల రోడ్లపై నీరు నిలిచింది. అంధేరి సబ్‌వే పూర్తిగా నీట మునిగింది. పశ్చిమ శివారు మలాడ్‌లో బస్ డిపో దగ్గర భారీగా నీరు నిలిచింది.

భారత వాతావరణ శాఖ (IMD) అధికారులు తెలిపిన వివరాల ప్రకారం, రాబోయే మూడు నాలుగు రోజుల్లో ఉత్తర భారతదేశంలో ఇదే వాతావరణం కొనసాగుతుంది. కొన్ని ప్రాంతాల్లో మధ్యాహ్నం వరకు 2 నుంచి 3 డిగ్రీల ఉష్ణోగ్రత పెరుగుతుంది. ఈశాన్య రాష్ట్రాల్లో ఈదురుగాలులు, ఉరుములు, మెరుపులతో కూడిన భారీ వర్షాలు కురిసే అవకాశం ఉందని హెచ్చరించారు.