హైదరాబాద్‌లో కొత్త ఆస్తి పన్ను విధానం — వచ్చే ఆర్థిక సంవత్సరం నుంచి మార్కెట్ విలువ ఆధారిత వసూళ్లు

హైదరాబాద్‌లో వచ్చే ఆర్థిక సంవత్సరం నుంచి ఆస్తి పన్ను లెక్కలు మారనున్నాయి. ఇప్పటివరకు అద్దె విలువ (రెంటల్ వాల్యూ) ఆధారంగా పన్ను వసూలు చేస్తున్నారు. కొత్త విధానంలో మార్కెట్ విలువ ఆధారంగా పన్ను విధిస్తారు. ఈ మార్పు గ్రేటర్ హైదరాబాద్, సైబరాబాద్, మల్కాజగిరి కార్పొరేషన్ల పరిధిలో అమలవుతుంది.

బిల్డింగ్ విస్తీర్ణం, భూమి మార్కెట్ విలువ, నిర్మాణ స్వభావం, భవన వినియోగం ఈ లెక్కలో పరిగణనలోకి తీసుకుంటారు. సంబంధిత కార్పొరేషన్ల సిబ్బందికి ప్రత్యేక శిక్షణ ఇస్తున్నారు. నివాస భవనాలకు ఒక రేటు, వాణిజ్య భవనాలకు మరో రేటు ఉంటుంది.

నివాస భవనాల మార్కెట్ విలువపై 0.15 శాతం, వాణిజ్య భవనాల విలువపై 0.75 శాతం చొప్పున పన్ను లెక్కిస్తారు. దీనిపై అదనంగా 8 శాతం లైబ్రరీ సెస్ వసూలు చేస్తారు. ఐదు కంటే ఎక్కువ నివాస యూనిట్లు ఉన్న అపార్ట్‌మెంట్లలో ఫ్లాట్ విస్తీర్ణం, కాంపోజిట్ విలువ ఆధారంగా పన్ను నిర్ణయిస్తారు. ఉదాహరణకు 1000 చదరపు అడుగుల ఫ్లాట్‌కు చదరపు అడుగు విలువ ₹4,600గా తీసుకుంటే మొత్తం విలువ ₹46 లక్షలు అవుతుంది. దీనిపై 0.15 శాతం పన్ను ₹6,900 వస్తుంది. 8 శాతం లైబ్రరీ సెస్ కలిపితే ఏడాదికి మొత్తం ₹7,452 చెల్లించాల్సి ఉంటుంది.

అనుమతులు లేకుండా నిర్మించిన భవనాలు, మంజూరైన ప్లాన్‌కు విరుద్ధంగా నిర్మించిన అదనపు అంతస్తులపై కఠినంగా వ్యవహరించనున్నారు. అలాంటి నిర్మాణాలపై సాధారణ ఆస్తి పన్నుతో పాటు 300 శాతం పెనాల్టీ విధించే ప్రతిపాదన ఉంది.

కొత్త విధానంతో హైదరాబాద్‌లోని కొన్ని ప్రాంతాల్లో పన్ను 50 శాతం వరకు పెరిగే అవకాశం ఉందని అధికారులు అంచనా వేస్తున్నారు. ఒక్కసారిగా భారం పడకుండా దశలవారీగా అమలు చేయనున్నారు. ఏటా 10 శాతం చొప్పున పెంచుతూ ఆరేళ్లలో పూర్తి స్థాయి వసూళ్లకు చేరుకోవాలని లక్ష్యంగా పెట్టుకున్నారు. ప్రభుత్వం తుది ఉత్తర్వులు జారీ చేసిన తర్వాతే పన్ను వసూలు చేస్తారు.