హైదరాబాద్ మెట్రో టికెట్‌పై గంట సమయ పరిమితి.. రద్దు చేయాలని డిమాండ్

హైదరాబాద్ మెట్రోలో టికెట్‌కు గంట సమయ పరిమితి విధించారు. టికెట్ తీసుకున్న ఒక గంటలోపు ప్రయాణం పూర్తి చేయాలి. సమయం దాటితే ఎగ్జిట్ గేట్ వద్ద టికెట్ చెల్లదు.

కొత్త నిబంధన ప్రకారం టికెట్‌లో ఉన్న స్టేషన్ నుంచే ప్రయాణం మొదలుపెట్టాలి. టికెట్‌లో ఉన్న గమ్యస్థానంలోనే దిగాలి. మధ్యలో ఏ స్టేషన్‌లోనూ దిగకూడదు. సమయం మించినా, వేరే స్టేషన్‌లో దిగినా టికెట్ ఇన్వాలిడ్ అవుతుంది. అలాంటప్పుడు స్టేషన్ కంట్రోలర్ సహాయంతో కొత్త టికెట్ కొనాల్సి ఉంటుంది.

హైదరాబాద్ మెట్రోలో రోజుకు 4.5 లక్షలకు పైగా ప్రయాణాలు జరుగుతున్నాయి. టికెట్ల ద్వారా ఏటా ₹1,000 కోట్లకు పైగా ఆదాయం వస్తోంది. మెట్రో లోపల ప్రకటనల ద్వారా కూడా ఆదాయం ఉంటుంది.

రద్దీ ఎక్కువగా ఉన్నప్పుడు కొంతమంది ప్రయాణికులు ఇంటర్‌చేంజ్ వద్ద 15 నిమిషాలు ఆగి మరో ట్రైన్‌లో వెళ్తుంటారు. ఇప్పుడు అలా ప్రయాణిస్తే టికెట్ చెల్లదు. దీంతో రెండోసారి టికెట్ కొనాల్సి వస్తోందని ప్రయాణికులు చెబుతున్నారు.

భారతీయ రైల్వేలో టికెట్‌లో ఉన్న గమ్యానికి ముందు స్టేషన్‌లో దిగేందుకు అనుమతి ఉంది. మెట్రోలో మాత్రం ఆ వెసులుబాటు లేదు. ఈ కఠిన నిబంధనను వెనక్కి తీసుకోవాలని ప్రయాణికులు కోరుతున్నారు.