హైదరాబాద్‌లో దోమల బెడద తీవ్రం: సాయంత్రం 6 తర్వాత బయటకు రాలేకపోతున్న నివాసితులు

హైదరాబాద్‌లో దోమల బెడద తీవ్రమవుతోంది. గత పది రోజులుగా దోమల సంఖ్య గణనీయంగా పెరిగింది. సాయంత్రం ఆరు గంటల తర్వాత ఇళ్ల నుంచి బయటకు రావడానికి నివాసితులు భయపడుతున్నారు.

ఇళ్ల చుట్టూ ఉన్న ఖాళీ స్థలాల్లో చెత్త, మురికినీరు, డ్రైనేజీలు దోమలకు ఆవాసాలుగా మారాయి. చెరువుల్లో పేరుకుపోయిన మొక్కలు, ఆకులు దోమల సంఖ్య పెరగడానికి కారణమని స్థానికులు చెప్తున్నారు.

లంగర్ హౌస్ ప్రాంతంలో దోమలు గుంపులుగా కనిపించిన వీడియోలు సోషల్ మీడియాలో వైరల్ అయ్యాయి. సీజనల్ వ్యాధులు, వైరల్ ఫీవర్లతో ఆసుపత్రుల్లో రద్దీ పెరిగిందని నివాసితులు తెలిపారు. డెంగీ, మలేరియా వ్యాప్తి పట్ల వారు ఆందోళన వ్యక్తం చేస్తున్నారు.

అధికారులు ఫాగింగ్, యాంటీ లార్వా ఆపరేషన్లు చేపడుతున్నామని చెప్తున్నారు. కానీ క్షేత్రస్థాయిలో సమస్య తగ్గడం లేదని నివాసితులు అంటున్నారు.

చెరువులు, నాలాలు, డ్రైనేజీలు శుభ్రం చేయాలని, నిలువ ఉన్న నీటిని తొలగించాలని నివాసితులు డిమాండ్ చేస్తున్నారు. దోమల ఉత్పత్తి కేంద్రాలను గుర్తించి ప్రత్యేక డ్రైవ్ నిర్వహించాలని కోరుతున్నారు.