హైదరాబాద్‌లో విద్యుత్ అంతరాయాలు: ప్రజల నుంచి ఫిర్యాదులు, నిర్వహణ పనులే కారణమన్న అధికారులు

గ్రేటర్ హైదరాబాద్‌లో విద్యుత్ అంతరాయాలు పెరుగుతున్నాయి. వర్షాకాలం బెడద తగ్గించేందుకు జరుగుతున్న నిర్వహణ పనులు ఆలస్యమవుతుండటంతో పలు ప్రాంతాల్లో గంటల తరబడి కరెంట్ కోతలు విధిస్తున్నట్టు నగరవాసులు ఆరోపిస్తున్నారు.

అధికారులు మే నెల చివరికల్లా పనులు పూర్తి చేయాలని లక్ష్యం పెట్టుకున్నారు. అయితే జూన్, జూలై దాటినా ఆగస్టులోనూ మరమ్మత్తులు కొనసాగుతున్నాయి. అదనపు సిబ్బందిని నియమించకపోవడం వల్ల పనుల వేగం తగ్గిందని ప్రజలు చెబుతున్నారు.

ప్రేమ్ నగర్, తాతా నగర్ వంటి ప్రాంతాల్లో విద్యుత్ సరఫరా ఉదయం 9 నుంచి మధ్యాహ్నం 12 వరకు, మళ్లీ మధ్యాహ్నం 2 నుంచి సాయంత్రం 5 వరకు నిలిపివేస్తున్నారు. ఫోన్లు ఛార్జింగ్ లేకుండా, పిల్లల హోంవర్క్ ఆగిపోవడం, చిన్న వ్యాపారాలపై ప్రభావం పడుతోందని బాధితులు చెబుతున్నారు. ముందస్తు సమాచారం ఇవ్వడం లేదన్న ఫిర్యాదులు సైతం వినిపిస్తున్నాయి.

SPDCL ప్రత్యేక ఏర్పాట్లు చేసింది. 40 ట్రీ ప్రూనర్లతో పాటు 168 పోల్ ప్రూనర్లు, 59 చైన్సాలు, 530 ప్రూనింగ్ కట్టర్లను తీసుకొచ్చింది. చెట్ల కొమ్మలు తొలగించడం, స్తంభాల మరమ్మత్తులు, లైన్ల నిర్వహణ పనులు జరుగుతున్నాయి. ప్రతి ఫీడర్‌కు WhatsApp గ్రూప్ ఉందని, అక్కడే విద్యుత్ బందు సమయాలను తెలియజేస్తామని అధికారులు వివరించారు.

“ఇలాంటి నిర్వహణ పనులు ఏడాదికి రెండుసార్లు చేస్తాం. దీనివల్ల అర్ధరాత్రి బ్రేక్‌డౌన్‌లు తగ్గుతాయి. పెద్ద చెట్టు పడిపోయి ఫీడర్ బంద్ అయితే కొన్ని గంటలు సమయం పట్టే అవకాశం ఉంది” అని విద్యుత్ అధికారులు తెలిపారు. ఇటీవల గ్రీన్ ల్యాండ్స్‌లో ట్రాన్స్‌ఫార్మర్ రిపేర్ పనులను CMD స్వయంగా పరిశీలించారు.

వర్షాకాలం ముందస్తు పనులను గడువులోగా పూర్తి చేయాలని, విద్యుత్ అంతరాయాలు తగ్గించాలని నగరవాసులు కోరుతున్నారు.