AI, CCTV కెమెరాలతో వాయుకాలుష్య నిర్ధారణ: IIIT హైదరాబాద్ సరికొత్త టెక్నాలజీ

IIIT హైదరాబాద్‌లోని Smart City Living Lab పరిశోధకులు వాయుకాలుష్యాన్ని అంచనా వేయడానికి AI, CCTV కెమెరాల ఆధారిత కొత్త టెక్నాలజీని అభివృద్ధి చేశారు. ఖరీదైన ఎయిర్ క్వాలిటీ సెన్సార్ల అవసరం లేకుండా, సాధారణ సీసీ కెమెరాల వీడియో నుండి కాలుష్య స్థాయిలను గుర్తించేలా ఈ వ్యవస్థను రూపొందించారు.

నగరంలోని CCTV ఫుటేజీని AI విశ్లేషిస్తుంది. రోడ్లపై వాహనాల సంఖ్య, భారీ వాహనాల రద్దీ, చెత్త తగలబెట్టడం వంటి కాలుష్య కారకాలను గుర్తించి, ఆ ప్రాంతంలో వాయు కాలుష్య స్థాయిని అంచనా వేస్తుంది. ఎడ్జ్ ప్రాసెసింగ్ టెక్నాలజీ ద్వారా ఈ సమాచారం Integrated Command and Control Centre కు సెకన్లలో చేరుతుంది. దీంతో అధికారులు వెంటనే కాలుష్య నివేదికలను పొందుతారు.

విద్యార్థులు తెలిపిన వివరాల ప్రకారం, రెండేళ్ల క్రితం ప్రారంభమైన ఈ ప్రాజెక్టులో 26,000 సెలెక్టెడ్ ఇమేజ్‌లతో AI మోడల్‌ను ట్రైనింగ్ చేశారు. సీజన్, పగలు-రాత్రి తేడాలతో వచ్చే డేటా వైవిధ్యాన్ని చేర్చి మెరుగుపరిచారు. తొలుత 82 శాతం ఖచ్చితత్వం నమోదు కాగా, ఇప్పుడది 90 శాతానికి చేరింది.

ఈ టెక్నాలజీని ఇప్పటికే సంగారెడ్డి జిల్లా అధికారులకు పరిచయం చేశారు. నాగపూర్‌లోనూ పరీక్షించగా, అక్కడా 90 శాతం ఖచ్చితత్వం వచ్చిందని విద్యార్థులు తెలిపారు. ప్రజలు తమ ప్రాంతంలోని గాలి నాణ్యత తెలుసుకునేందుకు ప్రత్యేక మొబైల్ యాప్‌ను కూడా అభివృద్ధి చేస్తున్నారు. డేటా ప్రైవసీకి భంగం కలగకుండా అత్యాధునిక భద్రతా ప్రమాణాలు పొందుపరిచామని వివరించారు.

ప్రభుత్వ డేటా సెంటర్‌తో అనుసంధానం పూర్తయితే, హైదరాబాద్‌తో పాటు ఇతర నగరాల్లోనూ వాయుకాలుష్యాన్ని నిరంతరం పర్యవేక్షించే అవకాశం ఉంటుంది. అత్యంత కాలుష్యం ఉన్న ప్రాంతాలను గుర్తించి ట్రాఫిక్ మళ్లింపు, పాఠశాలలు-కార్యాలయాల వేళలు సర్దుబాటు వంటి చర్యలు తీసుకోవడానికి ఈ వ్యవస్థ ఉపయోగపడుతుంది.