దేశంలో తొలి హైడ్రోజన్ రైలు మార్చి 17న ప్రారంభం

భారతదేశంలో తొలి హైడ్రోజన్ రైలును మార్చి 17న ప్రారంభించనున్నారు. ప్రధాని నరేంద్ర మోదీ హర్యానాలోని జింద్ నుంచి ఈ రైలును జెండా ఊపి ప్రారంభిస్తారు.

ఈ రైలు జింద్-సోనిపత్ మార్గంలో పైలట్ ప్రాజెక్ట్‌గా నడుస్తుంది. మొదటి దశలో 89 కిలోమీటర్ల దూరం ప్రయాణిస్తుంది. రోజుకు రెండు రౌండ్ ట్రిప్పులు చేస్తూ మొత్తం 356 కిలోమీటర్లు ప్రయాణిస్తుంది.

ఈ రైలులో 682 సీట్లు ఉన్నాయి. రోజుకు 2600 మంది ప్రయాణికులను తరలించగల సామర్థ్యం ఉంది. ఇది డీజిల్‌కు బదులుగా 1200 కిలోవాట్ల హైడ్రోజన్ ఫ్యూయల్ సెల్ ద్వారా నడుస్తుంది. హైడ్రోజన్ ఆక్సిజన్‌తో చర్య జరిపి విద్యుత్ ఉత్పత్తి చేస్తుంది. ఆ విద్యుత్ రైలు మోటార్లను నడిపిస్తుంది.

హైడ్రోజన్ రైలు వల్ల ఎలాంటి కాలుష్యం ఉండదు. నీటి ఆవిరి మాత్రమే బయటకు వస్తుంది. దీంతో ఇది పర్యావరణ హిత రవాణా వ్యవస్థగా పరిగణించబడుతోంది.

ఈ రైలు గరిష్టంగా గంటకు 110 కిలోమీటర్ల వేగంతో ప్రయాణించగలదు. కానీ ప్రస్తుతం ఇది పైలట్ ప్రాజెక్ట్ కావడంతో భద్రతా ప్రమాణాల ప్రకారం వేగాన్ని నిర్ణయిస్తారు.

ఈ ప్రాజెక్ట్ కోసం భారతీయ రైల్వే రూ.111 కోట్లకు పైగా ఖర్చు చేసింది. ప్రస్తుతం హర్యానాలో మాత్రమే నడిచే ఈ రైలును భవిష్యత్తులో దేశంలోని ఇతర మార్గాలకు విస్తరించే అవకాశం ఉంది.