భారత్-జపాన్ భాగస్వామ్యం: వెయ్యి బయోగ్యాస్ ప్లాంట్లు, AI రంగంలో కీలక ఒప్పందాలు

భారత ప్రధాని నరేంద్ర మోదీ, జపాన్ ప్రధానితో జరిగిన ద్వైపాక్షిక చర్చల్లో ఇరు దేశాల సంబంధాలను మరింతగా పెంచే కీలక ప్రకటనలు వెలువడ్డాయి. ముఖ్యంగా భారతదేశంలో వెయ్యి బయోగ్యాస్ ప్లాంట్ల ఏర్పాటు, ఆర్టిఫిషియల్ ఇంటెలిజెన్స్ రంగంలో సహకారంపై సంయుక్త ప్రకటన జారీ చేశారు.

‘జపాన్–ఇండియా కో-ఆపరేటివ్ బయోగ్యాస్ ఫర్ గ్రోత్’ పేరుతో ప్రకటించిన ఈ కార్యక్రమంలో జపాన్ భారత పాల ఉత్పత్తిదారుల సహకార సంఘాల విస్తృత నెట్వర్క్ సాయంతో దేశమంతటా 1,000 బయోగ్యాస్ (బయో-సీఎన్జీ) ప్లాంట్లను నిర్మించనుంది. అమూల్ వంటి పాల సమాఖ్యల ద్వారా గ్రామీణ ప్రాంతాల్లో అందుబాటులో ఉన్న వ్యవసాయ వ్యర్థాలు, బయోమాస్ను ఉపయోగించి ఈ ప్లాంట్లు బయో-సీఎన్జీతోపాటు సేంద్రియ ఎరువును కూడా ఉత్పత్తి చేస్తాయి. ఫలితంగా ఇంధన భద్రతకు, గ్రామీణ సంపదకు ఇది ఊతమివ్వనుంది.

చర్చల్లో రెండో ప్రధాన అంశం ఆర్టిఫిషియల్ ఇంటెలిజెన్స్. సురక్షితమైన, నమ్మదగిన AI అందరి భద్రతకు, శ్రేయస్సుకు దోహదం చేయాలన్న ఉమ్మడి దార్శనికతను రెండు దేశాల నేతలు పునరుద్ఘాటించారు. ఈ నేపథ్యంలో AI రంగంలో సహకారంపై సంయుక్త ప్రకటన విడుదలైంది. ఇందులో AI స్టాక్‌లోని అన్ని అంశాలు— భౌతిక మౌలిక సదుపాయాల నుంచి ప్రజా ప్రయోజనాల కోసం AI అప్లికేషన్ల అభివృద్ధి వరకు— సహకారం కొనసాగించనున్నారు. అలాగే ఈ ఏడాది ఫిబ్రవరిలో న్యూఢిల్లీలో నిర్వహించిన ‘ఇండియా AI ఇంపాక్ట్ సమ్మిట్’ ఫలితాలను జపాన్ స్వాగతించింది.

అనంతరం కీలకమైన అవగాహన ఒప్పందాలు (ఎంఓయే) సంతకమయ్యాయి. బహుభాషా, శాస్త్రీయ రీజనింగ్ లార్జ్ లాంగ్వేజ్ మోడళ్ల అభివృద్ధి కోసం ఐఐటీ బాంబే ‘భారత్ గెన్’, జపాన్ నేషనల్ ఇన్స్టిట్యూట్ ఆఫ్ ఇన్ఫర్మేటిక్స్ మధ్య ఎంఓయే కుదిరింది. అదేవిధంగా భారత్‌కు చెందిన సర్వ్ AI, జపాన్‌కు చెందిన ప్రీఫర్డ్ నెట్‌వర్క్స్ పూర్తి AI టెక్నాలజీ స్టాక్‌లో సహకార ఫ్రేమ్‌వర్క్‌ను ఏర్పాటు చేసుకున్నాయి.