జూలై 1 నుంచి రైల్వే కొత్త రూల్స్: టికెట్ లేకుండా ప్రయాణిస్తే ₹500 ఫైన్, ధూమపానంపై కఠిన చర్యలు

జూలై 1 నుంచి రైలు ప్రయాణికులకు కొత్త నిబంధనలు అమలులోకి రానున్నాయి. జన విశ్వాస్ చట్టం కింద కేంద్ర ప్రభుత్వం ఈ నిబంధనలను గెజిట్ నోటిఫికేషన్ ద్వారా తీసుకొచ్చింది.

ఇప్పటి వరకు టికెట్ లేకుండా ప్రయాణిస్తే ₹250 జరిమానా ఉండగా, ఇకపై అది ₹500కి పెరిగింది. వేరే వ్యక్తి టికెట్పై ప్రయాణించినా ₹500 ఫైన్ విధిస్తారు.

ధూమపానంపై కఠిన నిబంధనలు తెచ్చారు. రైలులో సిగరెట్ లేదా ఇతర పొగాకు ఉత్పత్తులు వాడితే టికెట్ రద్దు చేసి, ప్రయాణికుడిని దించేస్తారు. భారీ జరిమానాతోపాటు కొన్ని సందర్భాల్లో జైలు శిక్ష కూడా విధించవచ్చు. రైల్వే ప్రాంగణంలో కూడా ధూమపానం పూర్తిగా నిషేధం.

మహిళలు ప్రయాణించే బోగీలోకి అనుమతి లేకుండా ప్రవేశించినవారికి ₹2500 జరిమానా విధిస్తారు. స్టేషన్లలో అనుమతి లేకుండా రైలు బోగీల్లోకి ప్రవేశించి వస్తువులు అమ్మేవారికి ₹2000 ఫైన్ ఉంటుంది. అనుమతి లేని ప్రమాదకర వస్తువులు తీసుకెళ్తే ₹10,000 వరకు జరిమానా పడే అవకాశం ఉంది.

రైలు ప్రయాణాల్లో ప్రవర్తన, భద్రత కోసం ఈ కొత్త నిబంధనలను కేంద్రం తీసుకొచ్చింది. ప్రయాణికులు ఈ మార్పులను గమనించాలని రైల్వే అధికారులు సూచించారు.