ఇంద్రకీలాద్రిపై శాకంబరీ ఉత్సవాలు ప్రారంభం; 32 టన్నుల కూరగాయలతో ప్రత్యేక అలంకరణ

విజయవాడలోని ఇంద్రకీలాద్రిపై కొలువైన కనకదుర్గ అమ్మవారి ఆలయంలో శాకంబరీ ఉత్సవాలు నేడు ఘనంగా ప్రారంభమయ్యాయి. ఈ వార్షిక ఉత్సవాలు 19వ సంవత్సరంలోకి అడుగుపెట్టాయి.

ఆలయ సిబ్బంది మొదటి విడతగా 32 టన్నుల కూరగాయలు, ఆకుకూరలతో పాటు 4 టన్నుల పండ్లను సేకరించి అమ్మవారి ఆలయాన్ని ప్రత్యేకంగా అలంకరించారు. వర్షాలు సమృద్ధిగా కురిసి పండేలా పాడి పంటలు సమృద్ధిగా పండాలనే ఉద్దేశంతో ఈ ఉత్సవాలు నిర్వహిస్తున్నట్లు ఆలయ అధికారులు తెలిపారు.

ఈ సందర్భంగా తెలంగాణలోని భద్రాద్రి కొత్తగూడెం జిల్లా, హైదరాబాద్ బీహెచ్ఈఎల్ ప్రాంతాల నుంచి భక్తులు పెద్దసంఖ్యలో తరలివచ్చారు. అమ్మవారి దర్శనం, కూరగాయల అలంకరణ చూసి భక్తులు సంతోషం వ్యక్తం చేశారు. ఆలయంలో అన్ని సౌకర్యాలు బాగున్నాయని, ప్రశాంతంగా దర్శనం చేసుకున్నామని భక్తులు తెలిపారు. ఉత్సవాలు రాబోయే రోజుల్లో కొనసాగుతాయి.