ఏపీ అసెంబ్లీ సమావేశాల ముందు వైఎస్సార్సీపీ ఎమ్మెల్యేలు, ఎమ్మెల్సీలతో జగన్ భేటీ

ఏపీ అసెంబ్లీ సమావేశాలు ఈ నెల 17వ తేదీ నుంచి ప్రారంభం కానున్న నేపథ్యంలో వైఎస్సార్సీపీ అధ్యక్షుడు జగన్మోహన్ రెడ్డి బుధవారం పార్టీ ఎమ్మెల్యేలు, ఎమ్మెల్సీలతో సమావేశమయ్యారు. సభలో అనుసరించాల్సిన వ్యూహంపై జగన్ దిశానిర్దేశం చేస్తారని పార్టీ వర్గాలు తెలిపాయి.

ఈ సమావేశంలో సభకు హాజరవుతారా లేదా అనే అంశంపై స్పష్టత వచ్చే అవకాశం ఉందని, రెండేళ్ల నుంచి అనుసరిస్తున్న విధానాన్నే కొనసాగిస్తారా లేక కొత్త వ్యూహాన్ని ఎంచుకుంటారా అనేది చర్చించనున్నట్లు సమాచారం. శాసనమండలికి ఎమ్మెల్సీలు వెళ్తారని, అసెంబ్లీకి మాత్రం ఎమ్మెల్యేలు దూరంగా ఉంటారన్న చర్చ పార్టీలో జరుగుతోంది. ఒకవేళ సభకు వెళ్లకపోతే బయట ప్రజా సమస్యలపై పోరాటం చేయాలని వైఎస్సార్సీపీ ఆలోచిస్తోందని తెలుస్తోంది.

ఈ సందర్భంగా డీఎస్సీ అంశాన్ని బలంగా లేవనెత్తాలని పార్టీ భావిస్తోంది. మంత్రి నారా లోకేశ్ రాజీనామా చేయాలని ఇప్పటికే డిమాండ్ చేసిన వైఎస్సార్సీపీ, మండలిలో ఈ అంశాన్ని ప్రస్తావించనున్నది.

మరోవైపు కూటమి నేతలు వైఎస్సార్సీపీకి సవాల్ విసిరారు. ధైర్యం ఉంటే అసెంబ్లీకి రావాలని, మెగా డీఎస్సీపై చర్చకు సిద్ధంగా ఉన్నామని కూటమి ప్రతినిధి సజల రామకృష్ణారెడ్డి అన్నారు. గతంలో టీచర్‌ను అవమానించిన వైఎస్సార్సీపీ, ఇప్పుడు బయట ఆరోపణలు చేయడం కాకుండా సభలో ఆధారాలతో మాట్లాడాలని ఆయన డిమాండ్ చేశారు. లోకేశ్, చంద్రబాబు రాజీనామా ఎందుకు చేయాలని ప్రశ్నిస్తూ, ప్రభుత్వం చేపట్టిన పోలవరం, భోగాపురం, రైతు సాయం, గ్రామీణ రోడ్లు వంటి అంశాలను సజల రామకృష్ణారెడ్డి ఎత్తిచూపారు. కూటమి సవాలును స్వీకరించి వైఎస్సార్సీపీ సభకు వస్తుందా అనేది జగన్ సమావేశం తర్వాతే తేలనుంది.

అసెంబ్లీ సమావేశాల నిర్వహణ, ప్రవేశపెట్టే బిల్లులు, చర్చించే అంశాలపై ప్రభుత్వం కసరత్తు చేస్తోంది. ఈ నేపథ్యంలో జగన్ ఎమ్మెల్యేలకు ఏ లక్ష్యాలు నిర్దేశిస్తారనేది ఆసక్తిగా మారింది.