జయలక్ష్మి కాలనీ రోడ్డు పునరుద్ధరణ, పాలకులకు వాసుల కృతజ్ఞతలు

హైదరాబాద్‌లోని వట్టినాగులపల్లి జయలక్ష్మి కాలనీ వాసులు మూసివేసిన రహదారి పునరుద్ధరణకు హైడ్రా కమిషనర్, మున్సిపల్ అధికారులకు కృతజ్ఞతలు తెలిపారు. 2023 నుంచి రోడ్డు మూసివేతతో ఇబ్బందులు ఎదుర్కొన్న స్థానికులు ఊరట పొందారు.

1992లో 174 మంది పోలీస్ ఉద్యోగులు 10 ఎకరాల భూమిని కొనుగోలు చేసి లేఔవుట్ అభివృద్ధి చేపట్టగా, 1996లో జీఓ 111 అమల్లోకి రావడంతో అభివృద్ధి నిలిచిపోయింది. అక్కడి సర్వే నెంబర్ 189లోని 6.5 ఎకరాల భూదాన్ భూమిని రిజిస్ట్రేషన్ నిషేధం ఉన్నా బోయినపల్లి శ్రీనివాసరావు అనే వ్యక్తి కొనుగోలు చేసినట్లు ఆరోపణలు ఉన్నాయి. ఆ భూమి మీదుగా కాలనీవాసులు 2023 వరకు ఎలాంటి ఆటంకం లేకుండా రాకపోకలు సాగించారు.

అయితే, శ్రీనివాసరావు 2023 నుంచి రోడ్డును టిన్ షీట్లతో మూసివేసి, కాలనీవాసులకు దారి లేకుండా చేశారు. ఈ సమస్యపై కలెక్టర్‌తో పాటు హైడ్రా అధికారులకు ఫిర్యాదు చేశారు.

ఫిర్యాదుపై స్పందించిన అధికారులు రోడ్డును పునరుద్ధరించారు. ఈ చర్యతో కాలనీ వాసులు సంతోషం వ్యక్తం చేస్తూ మున్సిపల్ కమిషనర్, హైడ్రా కమిషనర్ రంగనాథ్‌కు కృతజ్ఞతలు తెలిపారు. 'మా సమస్యను పరిష్కరించినందుకు మా జయలక్ష్మి కాలనీ తరపున మేము హైడ్రా కమిషనర్‌కు కృతజ్ఞతలు తెలుపుతున్నాం' అని ఒక నివాసి అన్నారు.