ప్రభుత్వ ఆసుపత్రి డాక్టర్ రమేష్ సస్పెండ్: ప్రైవేట్ క్లినిక్ నిర్వహణ, మరొక వైద్యుడిని నియమించుకున్నందుకు చర్య

సంగారెడ్డి జిల్లా జోగిపేట ప్రభుత్వ ఆసుపత్రిలో విధులు నిర్వహిస్తున్న డాక్టర్ రమేష్ సస్పెండ్ అయ్యారు. ప్రభుత్వం నుంచి జీతం తీసుకుంటూ ఆయన ప్రైవేట్ ఆసుపత్రి నిర్వహిస్తున్నట్లు, అక్కడే ఎక్కువ సమయం గడుపుతున్నట్లు వైద్య ఆరోగ్య శాఖ అధికారులు తేల్చారు.

రమేష్ తన బదులు జోగిపేట ప్రభుత్వ ఆసుపత్రిలో ఒక డెంటల్ డాక్టర్‌ను నియమించుకున్నారు. ఆ డెంటల్ డాక్టర్ ఆయన తరపున విధులు నిర్వహిస్తున్నారు.

వైద్య ఆరోగ్య శాఖ అధికారులు నిన్న సంగారెడ్డిలోని రమేష్ ప్రైవేట్ ఆసుపత్రి ‘కేబీఆర్ లైఫ్ కేర్’లో తనిఖీలు చేపట్టారు. క్లినికల్ ఎస్టాబ్లిష్మెంట్ యాక్ట్ నిబంధనలను ఉల్లంఘించి ఆసుపత్రి నడుపుతున్నట్లు గుర్తించారు. ల్యాబ్‌లో కాలం చెల్లిన పరికరాలు, రసాయనాలు ఉండడంతో ఆ ల్యాబ్‌ను సీజ్ చేశారు.

ఈ సంఘటనతో పాటు ఉమ్మడి మెదక్ జిల్లాలో చాలా మంది ప్రభుత్వ వైద్యులు ప్రైవేట్ ప్రాక్టీస్ చేస్తున్నట్లు, కొందరు తమకు బదులుగా వేరే వైద్యులను నియమించుకున్నట్లు అధికారులు గుర్తించారు. ఇతర వైద్యులపై విచారణ కొనసాగుతోందని తెలిపారు.