కరీంనగర్‌లో చిన్న డ్రైనేజీ నుంచి 3 ట్రాక్టర్ల ప్లాస్టిక్ చెత్త వెలికి

కరీంనగర్ మున్సిపల్ కార్పొరేషన్‌లో శివ థియేటర్ కోర్టు రోడ్డు సమీపంలోని ఒక చిన్న డ్రైనేజీ నుంచి భారీ మొత్తంలో ప్లాస్టిక్ వ్యర్థాలు బయటపడ్డాయి. ఈ వ్యర్థాలు దాదాపు మూడు ట్రాక్టర్ల నిండా ఉంటాయని అధికారులు అంచనా వేశారు.

వర్షాకాలం దృష్ట్యా మున్సిపల్ కార్పొరేషన్ డ్రైనేజీల క్లీనింగ్ చేపట్టింది. ఈ క్రమంలో సదరు డ్రైనేజీని కార్మికులు శుభ్రం చేస్తుండగా, అందులో నుంచి ప్లాస్టిక్ బాటిళ్లు, ఇతర వ్యర్థాలు భారీగా వెలువడ్డాయి.

మున్సిపల్ అధికారులు మాట్లాడుతూ, నగరంలో ఇంటింటి చెత్త సేకరణ జరుగుతున్నా, కొందరు నిర్లక్ష్యంగా డ్రైనేజీల్లో చెత్త పడేస్తున్నారని తెలిపారు. డ్రైనేజీల్లో చెత్త పేరుకుపోవడం వల్ల వర్షాకాలంలో నీరు నిలిచిపోయి రోడ్లు జలమయం కావడం, దోమలు వృద్ధి చెంది వ్యాధులు వ్యాపించే అవకాశం ఉందని వారు హెచ్చరించారు.

ఇప్పటికే ఈ డ్రైనేజీని పూర్తిగా శుభ్రం చేసినట్లు అధికారులు తెలిపారు. వచ్చే వర్షాకాలంలో నీటి ప్రవాహానికి అడ్డంకి లేకుండా ముందస్తు చర్యలు తీసుకుంటున్నట్లు పేర్కొన్నారు.