కాంగ్రెస్ ర్యాలీ రోడ్ బ్లాక్‌లతో NEET పరీక్ష మిస్ అయిన విద్యార్థులు - కుమారస్వామి, ప్రియాంక్ ఖర్గే మధ్య మాటల యుద్ధం

కాంగ్రెస్ ర్యాలీ కారణంగా రోడ్లు బ్లాక్ చేయడంతో కర్ణాటకలో పలువురు విద్యార్థులు NEET పరీక్షకు హాజరు కాలేకపోయారు. దీనిపై JDS నేత కుమారస్వామి, కాంగ్రెస్ మంత్రి ప్రియాంక్ ఖర్గే మధ్య తీవ్రస్థాయి మాటల యుద్ధం చోటు చేసుకుంది. NEET పరీక్ష ఉందని తెలిసి కూడా ర్యాలీ నిర్వహించి రోడ్లు మూసివేయడం విద్యార్థుల భవిష్యత్తుతో ఆటగా ఉందని కుమారస్వామి విమర్శించారు. విద్యార్థుల భవిష్యత్తు గురించి ఈ ప్రభుత్వానికి పట్టదని, కేవలం రాజకీయాలే ముఖ్యమని ఆయన ధ్వజమెత్తారు. అయితే, ఈ విమర్శలపై ప్రియాంక్ ఖర్గే స్పందిస్తూ, ట్రాఫిక్ అడ్వైజరీ జారీ చేశామని, ప్రత్యేక హెల్ప్‌లైన్ ఏర్పాటు చేసినట్లు తెలిపారు. ఒక్క విద్యార్థి కూడా పరీక్ష మిస్ కావడం దురదృష్టకరమని, అయితే సరైన హాల్ టికెట్ తీసుకురాని, తప్పుడు బస్సు ఎక్కిన విద్యార్థులకు తాను బాధ్యత వహించలేనని ఆయన స్పష్టం చేశారు. రాజకీయాలు చేయాలనుకుంటే సిద్ధంగా ఉన్నామని, అంతకు ముందు NEET లీకేజీలపై క్షమాపణ చెప్పాలని, NTA ఛైర్మన్, ధర్మేంద్ర ప్రధాన్ రాజీనామా చేయించాలని ఖర్గే కౌంటర్ ఇచ్చారు. NEET వంటి కీలక పరీక్ష రోజున ర్యాలీ నిర్వహించడం, రోడ్లు మూసేయడం విద్యార్థులపై తీవ్ర ప్రభావం చూపింది. ఈ ఘటన రాష్ట్ర రాజకీయాల్లో కొత్త వివాదానికి దారి తీసింది.