కృష్ణా బేసిన్‌లో వరద తగ్గుముఖం; ప్రాజెక్టుల నీటి నిల్వ వివరాలు

గత పది రోజులపాటు కృష్ణా బేసిన్ లోని ప్రాజెక్టులకు భారీగా వరద నీరు వచ్చింది. ఇప్పుడు వరద తగ్గుముఖం పట్టింది. ప్రస్తుతం వివిధ ప్రాజెక్టుల నీటి నిల్వల వివరాలు ఇలా ఉన్నాయి.

కర్ణాటకలోని ఆల్మట్టి ప్రాజెక్టులో 118.22 టిఎంసిల నీటి నిల్వ ఉంది. దీని పూర్తి సామర్థ్యం 123.08 టిఎంసిలు. ఆల్మట్టి నుంచి నారాయణపూర్‌కు 42,000 క్యూసెక్కుల వరద ప్రవాహం కొనసాగుతోంది.

నారాయణపూర్ ప్రాజెక్టులో ప్రస్తుతం 33.12 టిఎంసిల నీరు నిల్వ ఉంది. నారాయణపూర్ నుంచి జూరాలకు 57,000 క్యూసెక్కుల నీరు వెళ్తోంది. జూరాల ప్రాజెక్టులో గరిష్ట నిల్వ సామర్థ్యం 9.65 టిఎంసిలు కాగా, ప్రస్తుతం 8.53 టిఎంసిలు నీరు ఉంది.

జూరాల నుంచి శ్రీశైలం ప్రాజెక్టుకు 44,279 క్యూసెక్కుల ప్రవాహం ఉంది. శ్రీశైలం నీటి మట్టం 885 అడుగుల గరిష్టానికి కాస్త తక్కువగా 878 అడుగులు ఉంది. శ్రీశైలం పూర్తి నిల్వ సామర్థ్యం 215 టిఎంసిలు కాగా, ప్రస్తుతం 181 టిఎంసిలు నీరు ఉంది.

పోతిరెడ్డిపాడు, మల్యాల, హంద్రీ నీవా కాలువలకు 12,900 క్యూసెక్కుల నీటిని విడుదల చేస్తున్నారు.