ఎగువన వరదలతో కృష్ణా జలాలు తెలంగాణలోకి; జూరాలకు ప్రవాహం

మహారాష్ట్ర, కర్ణాటక రాష్ట్రాల్లో భారీ వర్షాలు కురుస్తున్న నేపథ్యంలో కృష్ణా నది జలాలు తెలంగాణలోని ప్రియదర్శిని జూరాల ప్రాజెక్టుకు చేరాయి. ఆదివారం రాత్రి 22,600 క్యూసెక్కుల వరదతో ప్రవాహం ప్రారంభమై, సోమవారం నాటికి మరింత పెరిగింది.

ప్రాజెక్టు డిప్యూటీ ఎగ్జిక్యూటివ్ ఇంజనీర్ నాగేశ్వరరావు మాట్లాడుతూ, జూరాల జలాశయంలో ప్రస్తుతం 5.87 టీఎంసీల నీరు నిల్వ ఉందని తెలిపారు. జలాశయం పూర్తి స్థాయిలో నిండిన తర్వాతే సాగునీటి కాల్వలకు నీటిని విడుదల చేస్తామని స్పష్టం చేశారు. కాబట్టి రైతులు మరికొన్ని రోజులు ఓపిక పట్టాల్సి ఉంటుందన్నారు.

నాగర్‌కర్నూల్ జిల్లా కొల్లాపూర్ మండలంలోని మహాత్మా గాంధీ లిఫ్ట్ ఇరిగేషన్ ప్రాజెక్టు కింద సోమవారం నుంచి సింగోటం, జొన్నలబొగుడ, గుడిపల్లి రిజర్వాయర్‌లకు నీటి పంపింగ్ ప్రారంభమైంది. ప్రాజెక్టు ఈఈ లోకిలాల్ ఆదేశాల మేరకు రిజర్వాయర్లు నింపుతున్నారు. నీటి మట్టం పెరుగుతున్నందున మత్స్యకారులు చేపల వేటకు వెళ్లొద్దని అధికారులు హెచ్చరించారు.

వరద ప్రవాహం ఇలాగే కొనసాగితే త్వరలోనే శ్రీశైలం ప్రాజెక్టుకు నీరు చేరే అవకాశముందని జలవనరుల శాఖ అధికారులు అంచనా వేస్తున్నారు. తెలంగాణలోనూ రాబోయే రోజుల్లో వర్షాలు పడితే రాష్ట్రంలోని ప్రాజెక్టులు నిండే పరిస్థితి కనిపిస్తోంది.