సియోల్‌లో మంత్రి లోకేష్: కొరియా డెస్క్ ఏర్పాటు, ఈ నెల 10న రోడ్‌షో

ఏపీ మంత్రి నారా లోకేష్ దక్షిణ కొరియా పర్యటనలో ఉన్నారు. సియోల్‌లో తెలుగు డయాస్పోరా సభ్యులతో సమావేశం నిర్వహించారు. అనంతరం భారత రాయబారిని కలిసి పెట్టుబడుల అవకాశాలపై చర్చించారు.

సమావేశంలో మాట్లాడుతూ, తెలుగు ప్రవాసులు రాష్ట్రానికి బ్రాండ్ అంబాసిడర్లని లోకేష్ పేర్కొన్నారు. కియా మోటార్స్ లాంటి పెట్టుబడులు ఏపీలో విజయవంతంగా నడుస్తున్నాయని, మరిన్ని కొరియన్ కంపెనీలను రప్పించాలని ఆయన అన్నారు.

రాయబారితో సమావేశంలో పలు ప్రతిపాదనలు చేశారు. అనంతపురంలో కియా, మోబిస్‌ యూనిట్లను ఈవీ క్లస్టర్‌గా విస్తరించాలని, గ్రీన్‌ఫీల్డ్ షిప్‌యార్డ్, బ్యాటరీ టెక్నాలజీ, గ్రీన్ హైడ్రోజన్, ఏఐ రంగాల్లో కొరియా భాగస్వామ్యం కావాలని కోరారు. ఇండియా సెమీకండక్టర్ మిషన్, ఏపీ ఎలక్ట్రానిక్స్ పాలసీ 4.0కు అనుగుణంగా కొరియన్ చిప్ కంపెనీలను ఆకర్షించేందుకు రాయబారి సహాయం అభ్యర్థించారు.

కొరియా కంపెనీలతో సమన్వయం కోసం ‘ఏపీ-కొరియా డెస్క్’ ఏర్పాటు చేయనున్నట్లు లోకేష్ ప్రకటించారు. చిన్న, మధ్యతరహా కొరియన్ పరిశ్రమల కోసం శ్రీ సిటీలో ప్రత్యేక ప్లగ్ అండ్ ప్లే టౌన్‌షిప్ ఏర్పాటు చేయడానికి సిద్ధంగా ఉన్నామని తెలిపారు.

డేటా సెంటర్లు, ఎయిర్ కండిషనింగ్ తయారీ రంగాల్లో ఇప్పటికే ఏపీలో పెట్టుబడులు పెరుగుతున్నాయని, ఎకోసిస్టం బలోపేతం చేస్తున్నామని లోకేష్ వివరించారు. ఈ నెల 10వ తేదీన సియోల్‌లో ఇన్వెస్టర్ రోడ్‌షో నిర్వహిస్తున్నట్లు తెలిపారు. కీలక ఒప్పందాలు కుదిరే అవకాశం ఉందని చెప్పారు. ముఖ్యమంత్రి చంద్రబాబు నాయుడు నాయకత్వంలో రాష్ట్రం వేగంగా అభివృద్ధి చెందుతోందని ఆయన పునరుద్ఘాటించారు.