సియోల్ పర్యటనలో లోకేశ్: నేడు LG ప్రెసిడెంట్ విందుకు హాజరు

దక్షిణ కొరియా పర్యటనలో ఉన్న ఏపీ మంత్రి నారా లోకేశ్ మూడో రోజు నేడు ఎల్జీ ప్రెసిడెంట్ ఆతిథ్య విందుకు హాజరుకానున్నారు. సియోల్‌లోని ఎల్జీ టవర్స్‌లో ఈ భోజన సమావేశం జరుగుతుందని ఆయన కార్యాలయం తెలిపింది.

ఎల్జీ గ్లోబల్ స్ట్రాటజీ సెంటర్ ప్రెసిడెంట్ యూన్జూ కోహ్ ఈ విందును ఏర్పాటు చేశారు. ఎల్జీ అనుబంధ సంస్థల సీనియర్ ప్రతినిధులు కూడా ఈ సమావేశంలో పాల్గొంటున్నారు. రాష్ట్రంలో పెట్టుబడుల అవకాశాలు, ఎలక్ట్రానిక్స్ రంగంలో సహకారం వంటి అంశాలు చర్చకు వచ్చే అవకాశం ఉంది.

పర్యటన రెండో రోజు బుధవారం ఆయన విస్తృతంగా పారిశ్రామికవేత్తలతో సమావేశమయ్యారు. ఆంధ్రప్రదేశ్‌లో పెట్టుబడుల అవకాశాలు, ప్రోత్సాహకాలను వివరించారు.

దక్షిణ కొరియా మెడికల్ డివైజ్ సంస్థ షువాల్స్ సీఈవో లీచియాంగ్ జీతో జరిగిన భేటీలో, ఆంధ్రప్రదేశ్‌లో షువాల్స్ ప్రతిపాదించిన రూ.300 కోట్ల పాదరక్షల తయారీ యూనిట్ నిర్మాణాన్ని వేగవంతం చేయాలని లోకేశ్ కోరారు.

తర్వాత సోలం గ్రూప్ గ్లోబల్ ఆపరేషన్స్ ఆఫీసర్ జీకాబ్ హాతో సమావేశమై, శ్రీ సిటీలో రూ.338 కోట్లతో నిర్మిస్తున్న ఈవీ చార్జర్, పవర్ మాడ్యూల్స్ ప్లాంటును త్వరగా పూర్తి చేసి ఉత్పత్తి ప్రారంభించాలని విజ్ఞప్తి చేశారు. డిస్ప్లే సంబంధిత ఉత్పత్తుల తయారీ కూడా ప్రారంభించాలని కోరారు. దీనికి సోలం ప్రతినిధులు సానుకూలంగా స్పందించినట్లు తెలిసింది.