క్రీడా శిక్షణ కేంద్రం ఏర్పాటుకు లోకేష్ ప్రతిపాదన.. గోయెంకాతో భేటీ

అమరావతిలో అంతర్జాతీయ ప్రమాణాలతో క్రీడా శిక్షణ కేంద్రం ఏర్పాటు చేయాలని మంత్రి నారా లోకేష్ ప్రతిపాదించారు. విశాఖపట్నంలో RPG గ్రూప్ ఎండీ శశ్వత్ గోయెంకాతో ఆయన భేటీ అయ్యారు.

గ్రామస్థాయి నుంచి ప్రొఫెషనల్ స్పోర్ట్స్ ఫ్రాంచైజీల వరకు ప్రతిభావంతులైన క్రీడాకారులను తీర్చిదిద్దేలా ప్రత్యేక కార్యచరణ రూపొందించాలని లోకేష్ కోరారు. ఆంధ్ర ప్రీమియర్ లీగ్‌లో స్థానిక జట్టును ఏర్పాటు చేయాలని సూచించారు. దీని ద్వారా రాష్ట్ర యువతకు జాతీయ, అంతర్జాతీయ స్థాయిలో అవకాశాలు కల్పించవచ్చని ఆయన చెప్పారు.

పరిశ్రమల విస్తరణపైనా భేటీలో చర్చ జరిగింది. మంగళగిరిలో లగ్జరీ అపరల్ బ్రాండ్ కోసం డిజైన్ తయారీ కేంద్రం ఏర్పాటు చేయాలని లోకేష్ ఆహ్వానించారు. గ్రీన్ ఎనర్జీ రంగంలో సోలార్ బ్యాటరీ ఎనర్జీ స్టోరేజ్, గ్రీన్ హైడ్రోజన్ ప్రాజెక్టులను విస్తరించాలని ప్రతిపాదించారు. Firstsource IT కార్యకలాపాలను విజయవాడతో పాటు విశాఖపట్నం, తిరుపతిలోనూ పెంచాలని కోరారు.

ఏపీలో ఇప్పటికే ₹3,286 కోట్లతో 349 మెగావాట్ల పవన విద్యుత్ ప్రాజెక్టును అభివృద్ధి చేస్తున్నామని శశ్వత్ గోయెంకా తెలిపారు. ప్రభుత్వ తాజా ప్రతిపాదనలను పరిశీలిస్తామని ఆయన చెప్పారు.