పెళ్లి శుభలేఖపై పుట్టిన తేదీ తప్పనిసరి: మహారాష్ట్ర ప్రభుత్వం

మహారాష్ట్ర ప్రభుత్వం బాల్య వివాహాలను నిరోధించేందుకు కీలక నిర్ణయం తీసుకుంది. ఇకపై పెళ్లి శుభలేఖలపై వధువు, వరుడి పుట్టిన తేదీలను తప్పనిసరిగా ముద్రించాలని ఆదేశించింది.

ఈ మేరకు మహిళా శిశు సంక్షేమ శాఖ మంత్రి అదితి తట్కరే మహారాష్ట్ర శాసనసభలో ప్రకటించారు. తల్లిదండ్రులు, శుభలేఖలను ప్రింట్ చేసే ప్రెస్‌లు, కళ్యాణ మండపాలు, ఈవెంట్ ఆర్గనైజర్లు అందరూ ఈ నిబంధన పాటించాల్సిందేనని ఆమె స్పష్టం చేశారు. నియమం ఉల్లంఘిస్తే చట్టపరమైన చర్యలు తప్పవని హెచ్చరించారు.

వధూవరుల వయసును ధృవీకరించడం ద్వారా బాల్య వివాహాలకు అడ్డుకట్ట వేయడం ఈ చర్య ఉద్దేశమని మంత్రి తెలిపారు. గతంలో రాజస్థాన్‌లో ఇదే మోడల్‌ను అమలు చేయడం వల్ల బాల్య వివాహాలు గణనీయంగా తగ్గాయన్న విజయాన్ని పేర్కొంటూ, మహారాష్ట్రలోనూ ఈ విధానాన్ని అమలు చేయాలని దేవేంద్ర ఫడ్నవీస్ ప్రభుత్వం నిర్ణయించిందని ఆమె వివరించారు.