తెలంగాణ కాంగ్రెస్ ఇంచార్జి మీనాక్షి నటరాజన్‌తో డీసీసీ అధ్యక్షులు, ఎమ్మెల్యేల సమావేశం

తెలంగాణ కాంగ్రెస్ వ్యవహారాల ఇంచార్జి మీనాక్షి నటరాజన్ హైదరాబాద్‌లోని పార్టీ కార్యాలయంలో నేడు రెండో రోజు డీసీసీ అధ్యక్షులు, ఎమ్మెల్యేలతో సమావేశం నిర్వహించారు. ఈ సందర్భంగా డీసీసీ అధ్యక్షులు ప్రోగ్రెస్ కార్డుతో రావాలని ఆమె ఆదేశించారు.

జిల్లా అధ్యక్షుల నియామకం తర్వాత వారు చేపట్టిన కార్యక్రమాలు, రాబోయే ప్రణాళికలు, పార్టీలో సమన్వయం, ప్రభుత్వ పథకాల అమలు వంటి అంశాలపై చర్చించారు. రేపు మంత్రులతో నటరాజన్ భేటీ కానున్నారు. జిల్లాల ఇంచార్జి మంత్రులతో పార్టీ విభేదాలు, బూత్ స్థాయి బలోపేతం, ప్రభుత్వ పథకాల అమలు తదితర విషయాలపై చర్చించనున్నారు.

మొదటి రోజు సమావేశంలో ఆమె పార్టీ నేతలకు కీలక సూచనలు చేశారు. పార్టీ లైన్ నుండి విముఖమవ్వడం కుదరదని, అలా చేస్తే కఠిన చర్యలు తప్పవని హెచ్చరించారు. ప్రభుత్వంతో సమన్వయం తప్పనిసరని, గ్రామస్థాయిలో పార్టీని బలోపేతం చేస్తూనే ప్రభుత్వ పథకాలను ప్రజల్లో విస్తృతంగా ప్రచారం చేయాలని సూచించారు.