హనుమకొండ: డబుల్ బెడ్ రూం ఇళ్ల పంపిణీ వేదికపై మంత్రులు, ఎమ్మెల్యే మధ్య వాగ్వాదం

హనుమకొండ జిల్లా కమలాపూర్‌లో డబుల్ బెడ్ రూం ఇళ్ల పంపిణీ కార్యక్రమం సందర్భంగా మంత్రులు, స్థానిక బీఆర్ఎస్ ఎమ్మెల్యే మధ్య వాగ్వాదం చోటుచేసుకుంది. కార్యక్రమానికి హాజరైన మంత్రులు పొంగులేటి శ్రీనివాస్ రెడ్డి, పొన్నం ప్రభాకర్‌లు ప్రసంగించారు.

ఈ సందర్భంగా కాంగ్రెస్ ప్రభుత్వం అధికారంలోకి వచ్చిన తర్వాతే డబుల్ బెడ్ రూం ఇళ్లను పూర్తి చేసి పేదలకు అందించామని మంత్రులు చెప్పారు. గత బీఆర్ఎస్ ప్రభుత్వం చేసిన అప్పుల వల్ల రాష్ట్ర ఆర్థిక పరిస్థితి దెబ్బతినడంతో మరిన్ని ఇళ్లు ఇవ్వడం ఆలస్యమైందని వివరించారు.

అక్కడే ఉన్న బీఆర్ఎస్ ఎమ్మెల్యే పాడి కౌశిక్ రెడ్డి ఈ వ్యాఖ్యలను అడ్డుకున్నారు. కేసీఆర్ హయంలోనే డబుల్ బెడ్ రూం ఇళ్ల నిర్మాణం పూర్తి అయ్యిందని ఆయన వాదించారు. దీంతో వేదికపైనే ఇరువురు నేతల మధ్య వాదోపవాదాలు జరిగాయి.

వేదికపై నేతలు వాదించుకుంటుండగా, కింద ఇరు వర్గాల కార్యకర్తలు నినాదాలు చేశారు. పరిస్థితి ఉద్రిక్తంగా మారడంతో వేదిక వద్దకు చేరుకోవడానికి ప్రయత్నించిన బీఆర్ఎస్ కార్యకర్తలను పోలీసులు అడ్డుకుని బయటకు పంపించారు.

ఈ ఘటనపై ఇతర పార్టీల స్పందన తెలియాల్సి ఉంది.