మూలపేట పోర్ట్ నిర్మాణం 75% పూర్తి; నవంబర్‌లో కార్యకలాపాలు ప్రారంభం

శ్రీకాకుళం జిల్లాలో నిర్మిస్తున్న మూలపేట గ్రీన్ ఫీల్డ్ పోర్ట్ పనులు 75% కంటే ఎక్కువ పూర్తయ్యాయి. ఈ ఏడాది నవంబర్ నాటికి పోర్ట్ కార్యకలాపాలు ప్రారంభించాలని ప్రభుత్వం లక్ష్యంగా పెట్టుకుంది. ₹4,361 కోట్ల ప్రాజెక్ట్ మొదటి దశలో 1,524 ఎకరాల్లో నాలుగు బెర్త్‌ల నిర్మాణం చేపట్టారు.

ఇప్పటివరకు బ్రేక్ వాటర్ నిర్మాణం 92%, బెర్త్‌లు 77% పూర్తయ్యాయి. డ్రెడ్జింగ్, రిక్లమేషన్ పనులు దాదాపు ముగిశాయి. పోర్ట్‌కు సమీపంలో 385 ఎకరాల భూసేకరణకు కేంద్రం అనుమతించింది. అంతర్గత రోడ్లు, కనెక్టివిటీ పనులు వేగంగా సాగుతున్నాయి.

గతంలో 2025 అక్టోబర్‌లో పూర్తి చేయాలనుకున్నా, భూసేకరణ సమస్యలతో ఆలస్యమైంది. ఈ నేపథ్యంలో నవంబర్‌కు సర్దుబాటు చేసినట్టు మంత్రి బీసీ జనార్ధన్ రెడ్డి తెలిపారు. నిర్వాసిత గ్రామాలకు పునరావాస కాలనీలు నిర్మించడంతోపాటు, నౌపాడ రైల్వే స్టేషన్ సమీపంలో గృహ నిర్మాణం కొనసాగుతోంది.

ఈ పోర్ట్ ఏపీతో పాటు, తీర ప్రాంతం లేని ఛత్తీస్‌గఢ్, జార్ఖండ్, మధ్యప్రదేశ్, దక్షిణ ఒడిశా రాష్ట్రాలకు అందుబాటులో ఉండే కార్గో గేట్‌వేగా నిలవనుంది. పూర్తయితే జిల్లాలో వేలాది ఉపాధి అవకాశాలు లభించగలవని భావిస్తున్నారు.