ములుగు జిల్లా: వెంకటాపురం-వాజేడు రహదారి దారుణంగా ఉంది; గుంతలు, ట్రాఫిక్ జామ్లతో ప్రజలు ఇబ్బందులు

ములుగు జిల్లా వెంకటాపురం-వాజేడు రహదారి తీవ్రంగా దెబ్బతింది. రోజూ భారీ బరువు కలిగిన లారీలు ఈ రోడ్డు మీద ప్రయాణించడంతో రోడ్డు ఉపరితలం ధ్వంసమైంది. రోడ్డు అంతటా పెద్ద పెద్ద గుంతలు ఏర్పడ్డాయి. వర్షం పడినప్పుడు నీరు నిలిచిపోయి రోడ్డు పూర్తిగా దుర్గమంగా మారుతుంది.

ఈ రోడ్డు మీద ప్రయాణించే స్కూలు, కాలేజీ విద్యార్థులు, వరంగల్-హనుమకొండ వైపు వెళ్లే ప్రజలు తీవ్ర ఇబ్బందులు పడుతున్నారు. ఆరుగుంటపల్లి గ్రామం వద్ద పాలెంవాగు ప్రాజెక్టు కాలువ మీద వంతెన నిర్మిస్తున్నారు. వంతెనకు రెండు వైపులా లోతైన గుంతలు ఉండటంతో లారీలు చిక్కుకుపోతాయి. దీంతో గంటల తరబడి ట్రాఫిక్ జామ్ అవుతోంది. అంబులెన్సులు కూడా ఈ రోడ్డుపై రాకపోకలు సాగించలేకపోతున్నాయి.

స్థానికులు తాము బతికి ఉండగా ఈ రోడ్లు బాగుపడతాయని నమ్మడం లేదని ఆవేదన వ్యక్తం చేస్తున్నారు. రోడ్డు మరమ్మత్తుల కోసం మంత్రి సీతక్క రోడ్ల శాఖ మంత్రి కోమటిరెడ్డితో మాట్లాడాలని ప్రజలు విజ్ఞప్తి చేస్తున్నారు.