ముంబై లోకల్ ట్రైన్లో కత్తితో దాడి చేసి వ్యక్తి హత్య: నిందితుడిని పన్వేల్‌లో అరెస్ట్ చేసిన రైల్వే పోలీసులు

ముంబై సబర్బన్ రైల్వే నెట్‌వర్క్‌లో గత వారం జరిగిన దారుణ హత్య కేసులో నిందితుడిని ప్రభుత్వ రైల్వే పోలీసులు (GRP) పన్వేల్‌లో అరెస్టు చేశారు. బోరివలి-నాలాసోపారా ఫాస్ట్ లోకల్ ట్రైన్ ఫస్ట్‌క్లాస్ కంపార్ట్‌మెంట్‌లో తలుపు మూసివేత వివాదంతో ఘర్షణ చెలరేగి, ఓ ప్రయాణికుడు మరొకరిపై కత్తితో దాడి చేయడంతో మయాంక్ లోహర్ (34) అక్కడికక్కడే మృతి చెందారు. ఈ కేసులో నిందితుడు రోషన్ (28) అనే వ్యక్తిని సుమారు 400 సీసీటీవీ ఫుటేజీలను విశ్లేషించిన అనంతరం పన్వేల్ నుంచి అదుపులోకి తీసుకున్నట్లు GRP అధికారులు మంగళవారం విలేకరుల సమావేశంలో తెలిపారు.

GRP కమిషనర్ ఆదేశాల మేరకు ఏడు ప్రత్యేక బృందాలు, 70 మంది సిబ్బంది సీసీటీవీ ఫుటేజీలతో పాటు టెక్నికల్, గోప్య మార్గాల ద్వారా నిందితుడి కోసం గాలించారు. దాడిలో మృతుడి ఛాతీ, పొత్తికడుపుపై మూడు నుంచి నాలుగు కత్తి పోట్లు గుర్తించినట్లు పోలీసులు వెల్లడించారు. నిందితుడు మీరా భండార్‌లో నివసిస్తుండగా, అంధేరీలో బార్‌కోడ్ సంబంధిత పని చేస్తున్నాడు. మృతుడు విరార్‌లో ఉంటూ అంధేరీలోనే ఉద్యోగం చేసేవాడు. ఇద్దరికీ పరస్పర పరిచయం లేదని, ట్రైనులో యాదృచ్ఛికంగా వివాదం జరిగిందని దర్యాప్తు అధికారి స్పష్టం చేశారు.

ఈ ఘటన ముంబై లోకల్ ట్రైన్లలో ప్రయాణికుల భద్రతపై మరోసారి ప్రశ్నలు లేవనెత్తింది. కొద్ది నెలల క్రితం ఇదే మార్గంలో ఓ ఉపాధ్యాయురాలు కూడా ఇలాంటి దాడిలో మృతి చెందిన విషయాన్ని విలేకరులు ప్రస్తావించగా, “ఒక్క ఘటనతో మొత్తం ముంబై లోకల్ వ్యవస్థను బద్నాం చేయడం సరికాదు. ప్రజా రవాణాలో భద్రతా అంశాలపై సూచనలు తప్పకుండా ఇస్తాం” అని GRP అధికారి బదులిచ్చారు. నిందితుడు కత్తి ఎందుకు తీసుకెళ్లాడు, ట్రైనులో ఎందుకు తిరుగుతున్నాడన్న దానిపై విచారణ కొనసాగుతోంది. ఈ కేసును బోరివలి రైల్వే పోలీస్ స్టేషన్‌లో బీఎన్ఎస్ సెక్షన్ 103 (హత్య) కింద నమోదు చేశారు.