నాసా ఉపగ్రహం పసిఫిక్‌లో భారీ వేడి నీటి అలను గుర్తించింది — ఎల్‌నినో ముప్పు పెరుగుతోంది

పసిఫిక్ మహాసముద్రంలో 14,500 కిలోమీటర్ల పొడవైన వేడి నీటి అలను నాసా ఉపగ్రహం గుర్తించింది. ఈ Kelvin వేవ్ ఎల్‌నినో ఏర్పడుతుందనడానికి ప్రధాన సంకేతమని శాస్త్రవేత్తలు చెప్తున్నారు. జూన్ 11 నుంచే అమెరికా సముద్ర, వాతావరణ సంస్థ NOAA ఎల్‌నినో ఆరంభాన్ని అధికారికంగా ప్రకటించింది.

ఈ వేడి అల కారణంగా కొన్ని ప్రాంతాల్లో సముద్ర మట్టం 15 సెంటీమీటర్లు పెరిగినట్లు సాటిలైట్ డేటా వెల్లడించింది. పసిఫిక్ సముద్ర ఉపరితల ఉష్ణోగ్రత సాధారణం కంటే 2°C కంటే ఎక్కువగా ఉండే అవకాశం 63% ఉందని అంచనా వేస్తున్నారు. ఇది 1997, 2015 సంవత్సరాల్లో నమోదైన సూపర్ ఎల్‌నినో స్థాయికి చేరితే తీవ్ర పరిణామాలు సంభవించే ప్రమాదముంది.

భారత్‌కు ఎల్‌నినో సాధారణంగా అనుకూలం కాదు. బలమైన ఎల్‌నినో ఏర్పడితే నైరుతి రుతుపవనాలు బలహీనపడి దేశంలో వర్షపాతం తగ్గుతుందని నిపుణులు హెచ్చరిస్తున్నారు. వ్యవసాయ రంగంపైనా ప్రభావం పడే అవకాశం ఉంది. అయితే ఇండియన్ ఓషన్ డైపోల్ (IOD) అనే మరో వాతావరణ వ్యవస్థ ఎల్‌నినో ప్రభావాన్ని కొంతవరకు తగ్గించగలదని శాస్త్రవేత్తలు భావిస్తున్నారు.

ప్రస్తుతం పసిఫిక్‌లో జరుగుతున్న ఈ పరిణామాలను ప్రపంచ వాతావరణ సంస్థలు నిశితంగా పరిశీలిస్తున్నాయి. ఈ ఏడాది శీతాకాలానికి ఎల్‌నినో గరిష్ట స్థాయికి చేరే అవకాశం ఉండడంతో ప్రపంచ వ్యాప్తంగా వాతావరణ మార్పులపై ఆందోళన వ్యక్తమవుతోంది.