హైదరాబాద్‌లో NHM ఉద్యోగుల మహా ధర్నా – రెగ్యులరైజేషన్, సమాన వేతనం డిమాండ్

నేషనల్ హెల్త్ మిషన్ (NHM) పరిధిలో పనిచేస్తున్న సుమారు 17,000 మంది ఉద్యోగులు హైదరాబాద్‌లోని ఇందిరా పార్క్ ధర్ణ చౌక్ వద్ద శాంతియుత మహా ధర్నా నిర్వహించారు.

తమను వెంటనే క్రమబద్ధీకరించి రెగ్యులరైజ్ చేయాలని, సమాన పనికి సమాన వేతనం కల్పించాలని, మహిళా ఉద్యోగులకు 180 రోజుల చెల్లింపు మెటర్నిటీ లీవ్ ఇవ్వాలని డిమాండ్ చేశారు. 2018 నుండి వేతనాలు పెరగకపోవడంతో తీవ్ర ఇబ్బందులు ఎదురవుతున్నాయని ఆవేదన వ్యక్తం చేశారు.

ఎన్‌హెచ్‌ఎం జెఎసి రాష్ట్ర అధ్యక్షుడు డాక్టర్ మహేంద్రరావు పూట మాట్లాడుతూ, 20 ఏళ్లుగా సేవలందిస్తున్న ఈ ఉద్యోగులను ఇప్పటివరకు రెగ్యులరైజ్ చేయలేదని, దేశంలోని ఇతర రాష్ట్రాల్లో ఎన్‌హెచ్‌ఎం ఉద్యోగులను రెగ్యులర్ చేసినట్లే తెలంగాణలోనూ చేయాలని డిమాండ్ చేశారు.

ఆదిలాబాద్ జిల్లా అధ్యక్షురాలు, హన్మకొండ జిల్లా ప్రతినిధి సహా పలువురు నేతలు మాట్లాడుతూ, గతంలో ఆరుగురు ఎమ్మెల్యేలు తమకు మద్దతుగా సీఎంకు లేఖ ఇచ్చినా ఫలితం లేదని తెలిపారు. డిమాండ్లు నెరవేర్చకపోతే ఉద్యమాన్ని ఉధృతం చేస్తామని హెచ్చరించారు.

ప్రభుత్వం నుంచి ఈ విషయంపై ఇప్పటివరకు ఎలాంటి స్పందన రాలేదు.