Operation Delta Hunt: 500 మంది బంగ్లాదేశ్ చొరబాటుదారులు అదుపులో

గుజరాత్‌లోని అహ్మదాబాద్, సూరత్, వడోదర, రాజ్‌కోట్, బరూచ్ సహా పలు నగరాల్లో పోలీసులు భారీ దాడులు చేపట్టారు. 'ఆపరేషన్ డెల్టా హంట్' పేరిట ఈ తనిఖీలు నిర్వహించారు. దాదాపు 500 మందికి పైగా అనుమానిత చొరబాటుదారులను అదుపులోకి తీసుకున్నారు.

పోలీస్ ఇంటెలిజెన్స్ అందించిన సమాచారం మేరకు, బంగ్లాదేశ్ నుంచి భారత్‌లోకి చొరబడుతున్న యువతీయువకులను ఏజెంట్లు లక్ష్యంగా చేసుకుంటున్నారు. వీరి ద్వారా ఫేక్ ఐడీ ప్రూఫ్‌లు తయారు చేయించి, ఆయా వ్యక్తుల సంపాదనలో 20% కమీషన్ వసూలు చేస్తున్నట్లు తెలుస్తోంది. కొన్ని సందర్భాల్లో వీరిని లైంగిక వృత్తులకు బలవంతం చేస్తున్నారని నివేదికలు సూచిస్తున్నాయి.

ఈ నెట్‌వర్క్ పశ్చిమ బెంగాల్, ఈశాన్య రాష్ట్రాలు, గుజరాత్ మీదుగా దేశంలోని పలు ప్రాంతాలకు విస్తరించిందని అధికారులు తెలిపారు. నిందితులు బ్యాంకు మార్గం కాకుండా అనధికారిక కోడ్ (హవాలా) ద్వారా డబ్బు తరలిస్తున్నారని దర్యాప్తులో వెల్లడైంది. గుజరాత్ డీజీపీ ఈ మేరకు సమాచారం ధ్రువీకరించారు.

'ఆపరేషన్ డెల్టా హంట్' గత నెల రోజులుగా కొనసాగుతోంది. అన్ని రాష్ట్రాల ఇంటెలిజెన్స్ సంస్థలు సమన్వయం చేసుకుంటూ ఈ దాడులు నిర్వహిస్తున్నాయి. పట్టుబడిన వ్యక్తుల నుంచి కీలక పత్రాలు స్వాధీనం చేసుకున్నట్లు పోలీసులు వెల్లడించారు. కొన్ని సమాచారాన్ని మాత్రం దర్యాప్తు దృష్ట్యా గోప్యంగా ఉంచామని, త్వరలో మరింత సమాచారం వెల్లడిస్తామని అధికారులు తెలిపారు.