పాలమూరు రంగారెడ్డి ఎత్తిపోతలకు జాతీయ హోదా పరిశీలనలో లేదు: కేంద్రం

తెలంగాణలోని పాలమూరు రంగారెడ్డి ఎత్తిపోతల పథకానికి (PRLIS) జాతీయ ప్రాజెక్టు హోదా ఇవ్వడం ప్రస్తుతం తమ పరిశీలనలో లేదని కేంద్ర ప్రభుత్వం రాజ్యసభలో స్పష్టం చేసింది. కాంగ్రెస్ ఎంపీ రేణుక చౌదరి అడిగిన ప్రశ్నకు కేంద్ర జలశక్తి శాఖ సహాయ మంత్రి రాజ్ భూషణ్ చౌదరి లిఖితపూర్వక సమాధానం ఇచ్చారు.

కృష్ణా నది జలాల పంపిణీ వివాదం ప్రస్తుతం ట్రిబ్యునల్ పరిధిలో ఉన్నందున ఈ ప్రాజెక్టుకు టెక్నో-ఎకనామిక్ మూల్యాంకనం చేయలేమని మంత్రి తెలిపారు. ప్రాజెక్టు సమగ్ర ప్రణాళిక (DPR)ను కూడా తెలంగాణ ప్రభుత్వానికి తిరిగి పంపినట్లు చెప్పారు. జాతీయ హోదా కింద ఆర్థిక సహాయంపై ఎలాంటి నిర్దిష్ట హామీ ఇవ్వలేదని వివరించారు.

గతంలో తెలంగాణ ప్రభుత్వం PRLIS, కాళేశ్వరం ప్రాజెక్టులకు జాతీయ హోదా కోరుతూ కేంద్రాన్ని అనేకసార్లు కోరింది. కేంద్రం గతంలో ఇకపై ఏ కొత్త ప్రాజెక్టుకు జాతీయ హోదా ఇవ్వబోమని పార్లమెంటులో ప్రకటించినా, 2023లో కర్ణాటకలోని ఎగువ భద్ర ప్రాజెక్టుకు ఆ హోదా కల్పించడంపై తెలంగాణ నేతలు అసంతృప్తి వ్యక్తం చేస్తున్నారు. పోలవరం, కెన్-బేత్వ వంటి ప్రాజెక్టులకు కూడా జాతీయ హోదా ఉంది. తెలంగాణ డిమాండ్ను కేంద్రం ఇప్పటివరకు పట్టించుకోలేదు.