రేపు పాండవ నిర్జల ఏకాదశి: ఉపవాస నియమాలు, విశిష్టత ఇదే

ఈ నెల 25వ తేదీన పాండవ నిర్జల ఏకాదశి వస్తోంది. హిందూ పంచాంగం ప్రకారం, ఈ ఏకాదశి సంవత్సరంలోని మొత్తం 24 ఏకాదశుల పుణ్యఫలాన్ని ఒక్కరోజులో ఇస్తుందని భక్తుల విశ్వాసం.

పురాణ కథనం ప్రకారం, పాండవుల్లో ఒకరైన భీముడు ప్రతి ఏకాదశి ఉపవాసం ఉండలేనని, ఒకే ఏకాదశి చేస్తే అన్ని ఏకాదశుల ఫలం లభించేలా మార్గం చూపాలని కోరాడు. అప్పుడు శ్రీకృష్ణుడు నీళ్లు కూడా తాగకుండా నిర్జల వ్రతం చేస్తే ఆ ఫలం దక్కుతుందని అనుగ్రహించాడు.

ఈ ఏకాదశి రోజున నీరు సైతం తాగకుండా ఉపవాసం ఉండటం ఉత్తమం. ఆరోగ్యం సహకరించని వారు ఫలాలు, పాలు, లేదా సాబుదాన వంటి ఫలహారాలు తీసుకోవచ్చు. కొందరు నీళ్లు మాత్రమే తాగి ఉపవాసం ఉంటారు. పూర్తి సామర్థ్యం ఉన్నవారు నిర్జల వ్రతం ఆచరించడం విశేషమని ధార్మిక పండితులు చెబుతున్నారు.

ఈ రోజు తులసి పూజ, శ్రీకృష్ణ నామ జపం, ఆలయ దర్శనం, గో సేవ చేయాలి. రాత్రి భగవన్నామ స్మరణతో జాగరణ చేయడం, ధార్మిక గ్రంథ పారాయణం వంటివి చేయమని ఇస్కాన్‌కు చెందిన ప్రణవానంద దాస్ సూచించారు. ఈ వ్రతం ఆచరించడం ద్వారా పాపాలు తొలగి కోరిన కోర్కెలు నెరవేరుతాయని భక్తులు నమ్ముతారు.