కొమరంబీం జిల్లాలో రోడ్డు లేక గర్భిణీలు కాలినడకన ఆస్పత్రికి ప్రయాణం

కొమరంబీం ఆసిఫాబాద్ జిల్లాలోని జిల్లేడ మురళిగూడా గ్రామంలో రహదారి సదుపాయం లేకపోవడంతో గర్భిణీలు తీవ్ర ఇబ్బందులు ఎదుర్కొంటున్నారు. ఈ గ్రామానికి చెందిన ఆరుగురు గర్భిణీలు నెలవారీ వైద్య పరీక్షల కోసం కాగజ్జనగర్ ప్రభుత్వ ఆసుపత్రికి వెళ్లేందుకు కష్టమైన ప్రయాణం చేయాల్సి వచ్చింది.

ఉదయాన్నే వారు గ్రామం నుంచి సుమారు ఒక కిలోమీటరు దూరం కాలినడకన గుట్ట ప్రాంతానికి చేరుకున్నారు. అక్కడి నుంచి బొలెరో వాహనంలో మూడు కిలోమీటర్లు ప్రయాణించి కమ్మార్గం చేరుకున్నారు. తర్వాత 108 అంబులెన్స్ ద్వారా కాగజ్జనగర్ ఆసుపత్రికి వెళ్లి స్కానింగ్, ఇతర పరీక్షలు చేయించుకున్నారు. ఈ ప్రయాణంలో స్థానిక ఆశా కార్యకర్తలు వారికి సహాయం అందించారు.

గ్రామానికి రహదారి లేని కారణంగా వర్షాకాలంలో బయటకు రావడం మరింత కష్టమవుతుందని గర్భిణీలు ఆందోళన వ్యక్తం చేస్తున్నారు. ప్రసవ సమయంలో తలెత్తే ఇబ్బందుల గురించి కూడా వారు భయపడుతున్నారు. రాష్ట్ర ప్రభుత్వం గర్భిణీల ఆరోగ్యానికి ప్రాధాన్యత ఇస్తున్నట్లు ప్రకటించినప్పటికీ, ఇలాంటి మారుమూల గ్రామాల్లో కనీస వసతులు కల్పించడంలో విఫలమవుతోందని విమర్శలు వినిపిస్తున్నాయి.