రేషన్ కార్డు ఈ-కేవైసీ: ఈ నెల 31 లోగా పూర్తి చేసుకోవాలి, ఆన్‌లైన్‌లో స్టేటస్ ఇలా చెక్ చేసుకోండి

తెలంగాణలో రేషన్ కార్డు ఉన్న ప్రతి లబ్దిదారుడు ఈ-కేవైసీ చేయించుకోవడానికి ఈ నెల 31వ తేదీ చివరి గడువుగా నిర్ణయించారు. నాలుగు రోజుల్లో ఈ ప్రక్రియ పూర్తి చేసుకోకపోతే రేషన్ కార్డు రద్దయ్యే అవకాశం ఉందని అధికార వర్గాలు సూచిస్తున్నాయి.

ఈ-కేవైసీ అంటే రేషన్ కార్డు వివరాలను ఆధార్ కార్డుతో అనుసంధానం చేయడం. రేషన్ కార్డులో పేరున్న ప్రతి సభ్యుడు విడిగా ఈ ప్రాసెస్ పూర్తి చేసుకోవాలి. దీనికి కేవలం ఆధార్ కార్డు సరిపోతుంది.

ఈ-కేవైసీని రేషన్ దుకాణాల్లో మాత్రమే చేయించుకోవచ్చు. ఆన్‌లైన్‌లో ఈ సౌకర్యం అందుబాటులో లేదు. షాపుల్లోని ఈపాస్ మిషన్ల ద్వారా బయోమెట్రిక్ (వేలిముద్రలు) నమోదు చేస్తారు. వేలిముద్రలు సరిగా రాని వారు కంటి ఐరిస్ స్కాన్‌తో కూడా వెరిఫికేషన్ చేయించుకోవచ్చు. సొంతూరిలో కాకుండా వేరే ప్రాంతంలో నివసించే వారు దగ్గరలోని ఏ రేషన్ దుకాణంలోనైనా ఉచితంగా ఈ-కేవైసీ పూర్తి చేసుకోవచ్చు.

ఈ-కేవైసీ స్టేటస్ ఈజీగా ఆన్‌లైన్‌లో చెక్ చేసుకోవచ్చు. epds.gov.in పోర్టల్‌లో FSC సెర్చ్ ఆప్షన్‌పై క్లిక్ చేసి, రేషన్ కార్డు నంబరు లేదా ఆధార్ నంబరు ఎంటర్ చేస్తే లబ్దిదారుల వివరాలు కనిపిస్తాయి. తెలంగాణ రాష్ట్ర ఏఈపీడీఎస్ పోర్టల్ నుంచి కూడా ఈ సమాచారం పొందవచ్చు.