రవీందర్ రైనా తీవ్ర ఖండన: ఒమర్ అబ్దుల్లా ఆరోపణలకు ఆధారాలు చూపాలని డిమాండ్

జమ్మూ కశ్మీర్ ముఖ్యమంత్రి ఒమర్ అబ్దుల్లా చేసిన ఎమ్మెల్యేల కొనుగోలు ఆరోపణలను భారతీయ జనతా పార్టీ (బీజేపీ) రాష్ట్ర అధ్యక్షుడు రవీందర్ రైనా నిరాధారంగా కొట్టిపారేశారు. తన ప్రభుత్వాన్ని కూల్చేందుకు తమ పార్టీ నేతలు 20 నుంచి 30 కోట్ల రూపాయలు ఆశ చూపారన్న ఒమర్ ఆరోపణలు పూర్తిగా అవాస్తవమని, రాజకీయ ప్రేరితమని ఆయన అన్నారు.

ఎవరు ఆ ప్రయత్నం చేశారు, ఏ ఎమ్మెల్యేలను సంప్రదించారు అనేవి వెంటనే బహిరంగంగా వెల్లడించాలని, సంబంధిత సుప్రీంకోర్టు న్యాయవాది పేరు చెప్పాలని రైనా డిమాండ్ చేశారు. అంతేకాకుండా సీబీఐ, యాంటీ కరప్షన్ బ్యూరో, పోలీసులకు ఫిర్యాదు చేసి ఎఫ్ఐఆర్ నమోదు చేయించాలని కూడా సీఎంకు సూచించారు. ‘ఆరోపణలు చేసి మౌనంగా ఉండటం ప్రజాస్వామ్యంలో కుదరదు. ఉన్న ఒక్క ఆధారమైనా బయటపెట్టాలి’ అని ఆయన అన్నారు.

గతంలో ఒమర్ అబ్దుల్లా స్వయంగా ప్రధాని మోదీ, హోంమంత్రి అమిత్ షా ప్రభుత్వం జమ్మూ కశ్మీర్ అభివృద్ధికి దిల్ ఖోల్కర్ సహకరించిందని ప్రశంసించారని రైనా గుర్తు చేశారు. ఇప్పుడు ఒక్కసారిగా ఇంత తీవ్రమైన ఆరోపణలు చేయడం విచిత్రంగా ఉందని, తన పార్టీలోని అంతర్గత విభేదాలపై ప్రజల దృష్టిని మరల్చే ప్రయత్నంగా భావించాల్సి వస్తుందని ఆయన అన్నారు.

బీజేపీ ఎప్పుడూ విలువల ఆధారిత రాజకీయాలను నమ్ముతుందని, ప్రభుత్వాన్ని కూల్చే దుష్ట సంప్రదాయాలతో తమకు ఎలాంటి సంబంధం లేదని రవీందర్ రైనా స్పష్టం చేశారు. ‘మాకు 21, 22 రాష్ట్రాల్లో ప్రభుత్వాలు ఉన్నాయి. జమ్మూ కశ్మీర్ ప్రభుత్వాన్ని కూల్చాల్సిన అవసరం లేదు’ అని ఆయన అన్నారు. ఒమర్ అబ్దుల్లా దగ్గర ఆధారాలు ఉంటే బహిరంగంగా పెట్టాలని, లేదంటే ఇది కేవలం రాజకీయ డ్రామా అని హెచ్చరించారు. ఒమర్ అబ్దుల్లా నుంచి ఇప్పుడు ఆధారాలు వెలువడతాయా అన్నది వేచి చూడాలి.