పెసర పంటలో ఎర్రగొంగళి పురుగు నివారణ చర్యలు: ఖమ్మం KVK సూచనలు

ఖమ్మం జిల్లాలో ఈ ఏడాది పెసర పంట విస్తీర్ణం గణనీయంగా పెరిగింది. అయితే, అడపాదడపా కురుస్తున్న వర్షాల వల్ల ఎర్రగొంగళి పురుగు (Red Hairy Caterpillar) పంటకు ముప్పుగా మారిందని వైరా కృషి విజ్ఞాన కేంద్రం (KVK) శాస్త్రవేత్త రవి తెలిపారు. ప్రస్తుతం మూడు ఆకుల దశలో ఉన్న పెసర పంటలో ఈ పురుగు ఆశించడం ఎక్కువగా గమనించినట్లు ఆయన చెప్పారు.

ఈ పురుగుకు నాలుగు దశలు ఉంటాయి. లార్వా పసుపు రంగు నుండి నలుపు రంగు వెంట్రుకలతో అల్లుకుపోయి ఉంటుంది. ప్యూప దశలో ముదురు గోధుమ రంగులో ఉంటుంది. తల్లి రెక్కల పురుగు ఎరుపు రంగు శరీరంపై నల్ల మచ్చలతో కనిపిస్తుంది. లార్వాలు ఆకు అడుగు భాగంలో చేరి మొదట పత్రహరితాన్ని తినేస్తాయి. తీవ్రమైతే పూర్తి ఆకులను తొలిచి, మొక్కకు కాండం మాత్రమే మిగిల్చే ప్రమాదం ఉందని శాస్త్రవేత్త వివరించారు.

నివారణ చర్యలుగా వేసవిలో లోతు దుక్కి చేయడం తప్పనిసరి. దీని వల్ల భూమిలో ఉన్న ప్యూపాలు బయటకు వచ్చి నశిస్తాయి. సరైన సమయంలో విత్తడం, తగినంత అంతరం, సిఫార్సు చేసిన విత్తనాల మోతాదు పాటించాలి. పెసరతో పాటు ఇతర అంతర పంటలు వేయడం, పంట మార్పిడి చేస్తే తెగులు ఉధృతి తగ్గుతుంది. తొలి దశలో లార్వాలను చేతితో తొలగించి నశింపచేయడం మంచిది.

పొలం చుట్టూ కందకాలు తీస్తే పురుగులు ఇతర పొలాలకు వెళ్లకుండా అడ్డుకోవచ్చు. జిల్లేడు చెట్లను పంట సరిహద్దులో ఉంచితే, ఆ పురుగులు జిల్లేడు మొక్కలకు ఆకర్షితమై, నాశనం చేయడం సులభం అవుతుంది. రసాయన నియంత్రణకు క్లోర్పైరిఫాస్ 0.6 ml లేదా క్వినాల్‌ఫాస్ 2 ml లీటరు నీటికి కలిపి, పురుగుల తీవ్రతను బట్టి మందులు మార్చుకుంటూ పిచికారి చేయాలని సూచించారు. లైట్ ట్రాప్‌లు పెడితే పురుగుల ఆకర్షణ ద్వారా సమస్యను అదుపు చేయవచ్చునని శాస్త్రవేత్త రవి వివరించారు.