రంగారెడ్డిలో నెక్స్ట్ జన్ సోలార్ మాడ్యూల్ తయారీ కేంద్రం ప్రారంభించిన సీఎం రేవంత్ రెడ్డి; కాలుష్య నియంత్రణపై కీలక వ్యాఖ్యలు

ముఖ్యమంత్రి రేవంత్ రెడ్డి మంగళవారం రంగారెడ్డి జిల్లాలో ఒక నెక్స్ట్ జన్ సోలార్ మాడ్యూల్ తయారీ కేంద్రాన్ని ప్రారంభించారు. కార్యక్రమంలో ఆయన కాలుష్య నియంత్రణ, పట్టణ ప్రణాళికపై పలు విషయాలు ప్రస్తావించారు.

కాలుష్యాన్ని కలిగించే పరిశ్రమలను నగరం బయటకు తరలిస్తున్నామని సీఎం తెలిపారు. చెరువులు, కుంటలు, నాలాలు ఆక్రమణకు గురికావడంతో హైదరాబాద్‌లో కాలుష్యం పెరిగిందని వివరించారు. ఎల్‌నినో వంటి ప్రకృతి విపత్తులకు కాలుష్యమే కారణమని చెప్పారు. కాలుష్య నివారణలో ప్రభుత్వంతో పాటు ప్రజల సహకారం కూడా అవసరమన్నారు.

ప్రతిపక్ష పార్టీలను ఉద్దేశించి మాట్లాడుతూ, తమ ప్రభుత్వాన్ని పని చేయనివ్వాలని కోరారు. ఐదేళ్లు ప్రజలు అధికారం ఇచ్చారని, చివరి ఆరు నెలల్లో ఎన్నికల రాజకీయాలు చేసుకోవచ్చన్నారు. రాష్ట్రాన్ని క్యూర్, ప్యూర్, రేర్ అనే మండలాలుగా విభజించి అభివృద్ధి పనులు చేపడుతున్నట్లు చెప్పారు.