యాదాద్రి భువనగిరి జిల్లాలో స్కూల్ బస్సు కింద పడి 3 ఏళ్ల చిన్నారి మృతి

యాదాద్రి భువనగిరి జిల్లా, భువనగిరి మండలం, వడపర్తి గ్రామంలో విషాద ఘటన జరిగింది. స్కూల్ బస్సు కింద పడి మూడేళ్ల రియాన్ష్ అనే బాలుడు మృతి చెందాడు.

రియాన్ష్ తల్లి తన పెద్ద కొడుకును స్కూల్ బస్సు నుంచి తీసుకెళ్లేందుకు చిన్నారిని వెంట తీసుకెళ్లింది. పెద్ద బిడ్డను దింపుకునే సమయంలో ఆమె రియాన్ష్‌ను కిందకు దించింది. ఈ సమయంలో బాలుడు బస్సు కిందికి పరుగెత్తాడు.

డ్రైవర్ దీన్ని గమనించకుండా బస్సు ముందుకు కదిలించడంతో టైరు రియాన్ష్ తల మీదుగా వెళ్లింది. ఆ చిన్నారి అక్కడికక్కడే ప్రాణాలు కోల్పోయాడు. తల్లి కళ్ల ముందే ఈ ఘటన చోటుచేసుకోవడంతో ఆమె స్పృహ కోల్పోయింది.

ఈ సంఘటనతో గ్రామంలో తీవ్ర దిగ్భ్రాంతి నెలకొంది. స్కూల్ బస్సు డ్రైవర్లు తక్కువ జీతాలతో నిర్లక్ష్యంగా బస్సులు నడుపుతున్నారంటూ స్థానికులు ఆవేదన వ్యక్తం చేశారు.