రాష్ట్ర ప్రణాళిక సంఘం ఉపాధ్యక్షుడు చిన్నారెడ్డి మనవరాలు రితి రెడ్డి భరతనాట్య అరంగేట్రం

హైదరాబాద్‌లోని అబిడ్స్‌లో ఉన్న భారతీయ విద్యాభవన్‌లో రితి రెడ్డి భరతనాట్య అరంగేట్రం చేశారు. రాష్ట్ర ప్రణాళిక సంఘం ఉపాధ్యక్షుడు చిన్నారెడ్డి మనవరాలు అయిన రితి రెడ్డి, అమెరికాలో చదువుతూనే భరతనాట్యం నేర్చుకోవడం విశేషం.

ఈ సందర్భంగా చిన్నారెడ్డి మాట్లాడుతూ, భరతనాట్యం దేశ వారసత్వ సంపద అని, దానిని కాపాడుకోవాల్సిన అవసరం ఉందని అన్నారు. యువత చెడు వ్యసనాలకు దూరంగా ఉండేందుకు తల్లిదండ్రులు ఇలాంటి సాంస్కృతిక కళలను నేర్పించాలని సూచించారు.

రితి రెడ్డి తల్లి డాక్టర్ శిల్ప కూడా అదే వేదికపై మాట్లాడుతూ, తన కుమార్తె ఎలాంటి తప్పులు లేకుండా ప్రదర్శన ఇచ్చిందని ప్రశంసించారు. కార్యక్రమంలో ప్రముఖులు పాల్గొని రితి రెడ్డిని ఆశీర్వదించారు.