సాయి కృష్ణ అదృశ్యం: CBI దర్యాప్తు కోరుతూ తల్లి హైకోర్టులో పిటిషన్

గాది సాయి కృష్ణ అనే వ్యక్తి కనిపించకుండా పోయిన కేసులో తల్లి విజయలక్ష్మి హైకోర్టును ఆశ్రయించారు. ఈ వ్యవహారాన్ని CBI లేదా ఏదైనా స్వతంత్ర దర్యాప్తు సంస్థకు అప్పగించాలని కోరుతూ ఆమె అనుబంధ పిటిషన్ దాఖలు చేశారు.

విజయవాడ కృష్ణలంక పోలీస్ స్టేషన్ సిబ్బంది తన కుమారుడిని అదృశ్యం చేసేందుకు ప్రమేయం ఉన్నదని ఆమె ఆరోపించారు. ఈ ఘటన జరిగిన 40 రోజుల పాటు విజయవాడ పోలీస్ కమిషనర్ మౌనంగా ఉండిపోయారని, ఎఫ్ఐఆర్ నమోదులో జాప్యం జరిగిందని, సీసీటీవీ ఫుటేజ్ అందుబాటులో లేదని ఆమె తెలిపారు. స్థానిక పోలీసులు వాస్తవాలు దాచిపెడుతున్నారని, దాంతో సిట్ దర్యాప్తు కూడా ఫలితం ఇవ్వలేదని విజయలక్ష్మి చెప్పారు.

ఈ కేసులో విజయలక్ష్మి ఇంతకుముందు హెబియస్ కార్పస్ పిటిషన్ దాఖలు చేసారు. ఈ నెల 29న ఈ పిటిషన్ పై హైకోర్టులో విచారణ జరగనుంది. ఈ ప్రధాన వ్యాజ్యంలోనే తాజాగా అనుబంధ పిటిషన్ దాఖలు చేసి, ఈ వ్యవహారాన్ని కోర్టు పర్యవేక్షణలో స్వతంత్ర సంస్థకు అప్పగించాలని కోరారు.