విజయవాడ ఇంద్రకీలాద్రిపై కనకదుర్గమ్మ శాకంబరి మహోత్సవాలు ప్రారంభం

ఇంద్రకీలాద్రిపై కొలువైన కనకదుర్గమ్మ ఆలయంలో ఆషాఢమాసం సందర్భంగా శాకంబరి మహోత్సవాలు ప్రారంభమయ్యాయి. మూడు రోజుల పాటు జరిగే ఈ ఉత్సవాల్లో తొలి రోజు అమ్మవారిని శాకంబరి దేవిగా అలంకరించారు.

ఆలయ ప్రాంగణంలో 24 టన్నుల కూరగాయలు, వివిధ రకాల పండ్లతో ప్రత్యేక అలంకరణలు చేశారు. రెండో రోజు పళ్లతో, మూడో రోజు డ్రై ఫ్రూట్స్ తో అలంకరిస్తారని ఆలయ అధికారులు తెలిపారు.

భక్తులు అధిక సంఖ్యలో దర్శనానికి వస్తుండటంతో, ఎలాంటి ఇబ్బందులు లేకుండా ఆలయ నిర్వాహకులు భద్రతా ఏర్పాట్లు చేశారు. ఉత్సవాల సందర్భంగా కూరగాయలతో తయారు చేసిన కదంబ ప్రసాదాన్ని భక్తులు స్వీకరిస్తున్నారు.